Апелира до сите пратеници да го поддржат формирањето и одржувањето анкетна комисија само за трагедијата во Кочани. Сепак, посочи дека пратеничката група на СДСМ ќе ја поддржи иницијативата на ВМРО-ДПМНЕ и владејачката коалиција за комисија на која ќе се разговара за сите претходни трагедии
Социјалдемократскиот сојуз (СДСМ) смета дека во Собранието треба да има две анкетни комисии. Едната што ја предлага владејачкото мнозинство, на која ќе се дискутира за сите трагедии досега, и една посебна анкетна комисија што ќе биде наменета само за трагедијата во Кочани.
Ова на денешната прес-конференција во Собранието го рече пратеникот и лидер на СДСМ, Венко Филипче, посочувајќи дека имаат обврска да организираат и посебна анкетна комисија само за трагедијата во Кочани, зашто тоа е и барање на родителите на загинатите и повредени деца.
„Нашиот став е дека ќе ги поддржиме двете анкетни комисии. Едната, која ја предлага владејачкото мнозинство, каде што сакаат да се дискутира за сите трагедии во минатото. Но, сметам дека имаме обврска да организираме и посебна анкетна комисија само за трагедијата во Кочани бидејќи мора да имаме одговорност пред општеството и пред државата. Тоа, пред сè, е барање на родителите на загинатите и на повредените деца“,
рече Филипче.
Тој апелира до сите пратеници да го поддржат формирањето и одржувањето анкетна комисија само за трагедијата во Кочани. Повтори дека пратеничката група на СДСМ ќе ја поддржи иницијативата на ВМРО-ДПМНЕ и владејачката коалиција за комисија на која ќе се разговара за сите претходни трагедии.
Според него, во јавноста излегоа повеќемина кои ги коментираа овие иницијативи, чии ставови ги смета за легитимни, од тоа дека треба да се земе предвид дали за случаите има судски процеси и дали се завршени.
„Ние, имаме, пред сè, морална обврска пред сите луѓе што го бараат ова од нас. Мора да се слушне гласот во Собранието на луѓето чијшто ова е дом. Тоа се сите граѓани, во конкретниот случај родителите на загинатите и повредени деца што го бараат ова од нас“,
кажа тој.
Очекува пратениците да ја поддржат анкетната комисија за несреќата во Кочани, а, како што додаде, СДСМ ќе ја поддржи и другата анкетна комисија.
Пратениците на СДСМ и коалицијата на 18 ноември поднесоа иницијатива за основање анкетна комисија за трагедијата во Кочани. Кон иницијативата, која беше дел и од барањата на семејствата на загинатите и повредените во пожарот, се придружија и пратениците од Левица.
Партиите од владејачкото мнозинство, пак, поднесоа своја. Така, пратеничките групи на ВМРО-ДПМНЕ, ВЛЕН и ЗНАМ, кои стојат зад иницијативата, исто така предлагаат формирање анкетна комисија. Но, освен за трагедијата во Кочани, тие бараат на неа да бидат разгледани и претходните случаи, за кои од владејачкото мнозинство сметаат дека не добиле соодветна правна разрешница.
Освен пожарот во „Пулс“, владејачкото мнозинство бара на анкетната комисија да бидат разгледани и случаите со автобуските несреќи на „Дурмо турс“ и „Беса транс“, како и пожарот во модуларната болница во Тетово.