Од УХМР предупредуваат дека овие пообилни врнежи од дожд може да предизвикаат истекувања на помалите водотеци кои може да доведат до проблеми и на патиштата кои се во нивна близина, а на одредени места можна е и појава и на свлечишта и одрони
Во следните 24 часа се очекува да има пообилни врнежи од дожд, информираат од Управата за хидрометеоролошки работи (УХМР).
Пообилните врнежи, кои се очекува на одредени места да бидат и над 40 милиметри, според синоптичарите, прво ќе бидат во западните делови од земјата, а потоа ќе се прошират на целата територија. Врнежите се очекува да бидат проследени со грмежи и со силен ветер.
Од УХМР предупредуваат дека овие пообилни врнежи од дожд може да предизвикаат истекувања на помалите водотеци кои може да доведат до проблеми и на патиштата кои се во нивна близина, а на одредени места можна е и појава и на свлечишта и одрони.
Иако, како што велат од УХМР, генерално водотеците низ државата се со ниски и потпросечни протекувања за овој дел од годината, сепак нагласуваат дека треба да се внимава кај помалите водотеци.
Пообилните врнежи, од УХМР велат дека во одредени градски населби може да доведат до истекување на канализациските води што ќе предизвика појава на локални комунални проблеми.
„Поголема внимателност генерално е потребна на западот, југозападот, северот, североистокот и истокот на Македонија, како и во одредени централни делови од државата“,
посочуваат од УХМР.
Според мерењата што ги имаат, од повеќе модели, од УХМР велат дека поголеми врнежи може да има на западот и на истокот на државата.
До 19 часот, како што се вели во информацијата од УХМР, најмногу наврнат воден талог имало во Маврови Анови и тоа 49 литри на метар квадратен, потоа во Петровец во Скопје – 18, седум литри на метар кавдартен на Зајчев рид во Скопје.
Вредности за количината врнежи, додаваат од УХМР, се измерени на дождомерните места на Управата, но нагласуваат дека, поради локалноста на процесите, паднатата количина воден талог многу варира и на различни места може да е многу поголема од измерената.