Министерството за внатрешни работи на Република Српска уапси осум лица во рамки на акцијата „Вектор“, насочена кон откривање интернет-измами и изнуда на стотици илјади конвертибилни марки, јави дописникот на МИА. Вкупно се осомничени 26 лица.
Акцијата е спроведена во областа Фоча, Хан Пијесак и Источно Сараево, каде што се извршени претреси на 25 локации што ги користеле 26 лица, а се однесува на типување во обложувачници во врска со наводно наместени спортски натпревари.
„Групата е осомничена дека од октомври 2020 година преку социјалните мрежи рекламирале дека има информации за наместени спортски натпревари. Со помош на апликации за комуникација, стапиле во контакт со повеќе оштетени лица од Северна Македонија, Србија, Хрватска, Црна Гора, Словенија, Австрија, Швајцарија, Германија, Франција и други земји, и лажно презентирајќи ги и прикривајќи ги фактите ги држеле во заблуда дека поседуваат информации за наместени натпревари и ги наведувале да уплаќаат пари за наводното обложување“,
објави Министерството за внатрешни работи на РС.
Во соопштението се наведува дека осомничените со закани изнудувале и принудувале жртвите да плаќаат и дополнителни пари.
Со овие кривични дела, осомничените се стекнале со имотна корист во износ од неколку стотици илјади конвертибилни марки, наведуваат од Министерството за внатрешни работи на РС.
Против сите 26 осомничени ќе биде поднесена пријава за кривичните дела измама, перење пари и изнуда преку социјалните мрежи.