Вкупно седум припадници на Дирекцијата за заштита и спасување (ДЗС) од денеска се ангажирани во потрагата по десетгодишниот Петар на кого трагата му се изгуби пред четири дена
По четири дена од исчезнувањето на десетгодишниот Петар Џобоски, од денеска, во неговата потрага се приклучи и Дирекцијата за заштита и спасување (ДЗС).
„Во потрагата се ангажирани седум припадници на ДЗС од кои четири од Тимот за брз одговор за спасување од планини од ПОЗС – Битола, еден припадник од Тимот за спасување од високи објекти од ПОЗС – Прилеп и двајца вработени од Секторот за оператива и логистика“,
соопшти Дирекцијата за заштита и спасување.
Во потрагата по Петар, досега се ангажирани 102 полициски службеници, хеликоптер, службени кучиња, како и дрон, а во потрагата се вклучени и членови на Територијалната противпожарна единица Прилеп, членови на спасителната служба „Златоврв“, ловното друштво „Мукос“-Прилеп, жители на околните села, како и граѓани доброволци од неколку градови.
Во меѓувреме, Основно јавно обвинителство во Прилеп отвори предмет за исчезнатото дете.
На десетгодишниот Петар трагата му се губи во петокот по 16 часот. Родителите на Петар, со своите три деца од Прилеп, каде живеат, неколку дена биле во селото Врбско за да ги проверат пчелите. Петар е дете со посебни потреби кое тешко комуницира. Кога исчезнал бил во лесна облека.