При нападот во воз во Токио, кој беше извршен денеска од маж вооружен со нож, повредени се 17 лица, од кои три потешко.
Мажот прво со нож ранил неколку патници, а потоа предизвикал пожар, поради што патниците скокнале од прозорците, соопшти полицијата.
Напаѓачот, идентификуван како 20-годишен маж, е уапсен на самото место на злосторството. Тој е осомничен за обид за убиство, а мотивот сѐ уште не е познат.
Очевидци и рекле на полицијата дека напаѓачот носел светла облека, зелена кошула, син костум и виолетово палто и дека изгледал како лик од стрипови или некој што оди на прослава на Ноќта на вештерките.
Откако ги избол патниците со нож, осомничениот истурил течност слична на масло и предизвикал пожар во кој изгореле дел од седиштата.
Нападот се случил околу 20 часот по локално време, во моментот на затворање на гласачките места на парламентарните избори во Јапонија.
Денешниот инцидент е втор напад со нож во воз во Токио во последните два месеца.
Во август, еден ден пред церемонијата на затворање на Олимписките игри во Токио, 36-годишен маж избоде десет патници во воз. Подоцна ѝ рекол на полицијата дека сакал да нападне жени што изгледале среќни.