Специјалното обвинителство на Република Косово соопшти дека на тројцата приведени им е одреден 48-часовен притвор и дека се сомничат за кривичните дела злоупотреба на службената должност и пружање помош во извршувањето на кривичното дело злоупотреба на службената должност
Двајца раководители од Министерството за индустрија, претприемништво и трговија на Косово (МИПТ) и еден бизнисмен се уапсени денеска поради сомневања за малверзации при набавка на стоки за државните резерви.
Во полициската акција која започнала претпладнево и која била изведена во МИПТ и во стан и локал во Приштина, приведени се директорот на Управата за стокови државни резерви, Хафиз Гара и директорот на Одделот за европски интеграции и координација на политиките при Министерството, Ирфан Липовица, како и бизнисменот Ридван Мухареми, за кого дел од медиумите наведуваат дека е близок до премиерот Албин Курти и до вицепремиерот задолжен за евроинтеграции, Бесник Бислими.
Специјалното обвинителство на Република Косово соопшти дека на тројцата приведени им е одреден 48-часовен притвор и дека се сомничат за кривичните дела злоупотреба на службената должност и пружање помош во извршувањето на кривичното дело злоупотреба на службената должност. При претресите во кацелариите на МИПТ и во станот и локалот на Мухареми, конфискувани се компјутери и документи кои ќе се користат во натамошната процедура.
Денешната полициска акција е изведена откако на крајот на минатиот месец порталот „Национале“ објави аудиоснимки од телефонските разговори во кои сега приведените функционери на МИПТ велат дека масло за јадење и пченица од Полска, кои веќе биле платени, не се доставени во државните резерви.
Во објавените разговори се инволвира и ресорната министерка Розета Хајдари, која по објавувањето во „Национале“ соопшти дека поднела кривична пријава за клевета против сопственикот на порталот, новинарот Берат Бужаља.