На родителите што ги изгубија своите деца во трагедијата им порача дека им се поклонува на нивната сила, оти тие луѓе не бараат ништо повеќе од правда и вистина. Според него, тие луѓе имаат право на вистина, на почит и право нивната болка никој да ја користи за партиски и политички поени
Во Кочани никој, ниту еден политичар не може да оди со крената глава, оти со крената глава не се оди пред луѓе што со месеци бараат правда. Ова вечерва го рече лидерот на опозицискиот Социјалдемократки сојуз (СДСМ), Венко Филипче во рамки на кампањата за локалните избори од Кочани, посочувајќи дека иако планот му бил да одржи политички говор, сепак, реалноста е дека не може да зборува политички, туку пред кочанчани ќе се обрати како човек и родител, кој ја чувствува болката на оние што на 16 март ги испратија децата на забава и не ги дочекаа назад.
„Тоа не е болка што се заборава и не е празнина што се пополнува, некогаш, кога било. Ова е трагедија што не смееме да ја заборавиме никогаш, за тоа колку животот е кревок, колку брзо може да се изгуби се и колку многу ни треба човечност, почит и грижа едни за други“,
кажа тој.
На родителите што ги изгубија своите деца во трагедијата им порача дека им се поклонува на нивната сила, оти тие луѓе не бараат ништо повеќе од правда и вистина.
„Тие луѓе имаат право на вистина, на почит и право нивната болка никој да ја користи за партиски и политички поени. Тоа е најголемиот грев, да ја претвориш трагедијата во алатка за политичка користи“,
кажа тој.
Посочи дека токму СДСМ беше првата партија што јавно постави прашање и бараше да нема селективност во овој случај, да нема заштитени и да одговараат сите од прв до последен.
„Вистината за Кочани ја објавивме кога видовме дека истрагата станува селективна и некој се обидува да ја затвори во тесен круг, дека се штитат функционери од институциите и јавноста останува без одговори. Тогаш излеговме со факти, документи и точни информации. Кога тоа се случи, Обвинителството мораше да постапи и истрагата се прошири. Притисокот на вистината го проби ѕидот што се градеше за да се заштитат одредени луѓе. Ова не го сметаме за победа или политичка заслуга. Тоа е исполнета морална обврска“,
вели Филипче.
Според него, во Кочани не може да се оди со крената клава, оти со крената глава не може да се оди кај оние што со месеци бараат правда.
„Јас нема да кажам дека сум дошол со крената глава. Дојдов тука како човек што е свесен дека политиката и политичките партии 30 години наназад се оние што го градеа овој систем. И никој нема право да се амнестира. Наназад не можеме да ги смениме работите, но можеме да извлечеме поуки и да го смениме системот. Да ја смениме иднината“,
рече лидерот на СДСМ.
Според него, во изминатата година се бори за вистинска и искрена реформска промена на државата.
„Се борев да направиме темелни реформи во судството и институциите. Се борев да ја бутнеме оваа земја напред во ЕУ, затоа што само така, верувајте, можеме од корен да ги смениме работите“,
кажа тој.
Смета дека граѓаните се доволно свесни да проценат кој се однесуваше државнички, а кој го покажа вистинското, грдо лице после најтешката трагедија во Кочани.
„За она што искрено жалам е што се изгуби шанса да покажеме дека барем кога е најтешко – знаеме да бидеме луѓе пред се. И не беше потребна голема храброст за тоа, беше потреебна само емпатија. Малку достоинство. Малку почит. Но, кога тие вредности недостасуваат кај луѓето што ја водат државата, се друго паѓа во сенка“,
вели Филипче.
Претходно, СДСМ одржа митинзи во рамки на кампањата за локални избори во Зрновци, Чешиново Облешево и Виница, каде ги претстави кандидатите за градоначалници и носители на советнички листи.