Намалување на бројот на вработени има во органите на државната власт, што не е случај со институциите во некои од клучните сектори, како здравството и детската и социјалната заштита, објави министерот за информатичко општество и администрација
Вкупно 131 183 вработени во вкупно 1 332 институции има во јавниот сектор заклучно со 31 декември 2020 година. Податоците ги објави денеска министерот за информатичко општество и администрација Јетон Шаќири на презентацијата на Годишниот извештај за вработените во јавниот сектор за 2020 година.
Од вкупниот број, 19 594 лица се вработени во Армијата, во Министерството за внатрешни работи, Агенцијата за национална безбедност, Агенцијата за разузнавање и во Управата за финансиска полиција. За овие вработени лица во извештајот не се прикажуваат други детални анализи, поради законски и безбедносни причини. Детална обработка и презентација на податоците се врши за другите 111 589 вработени лица.
Шаќири истакна дека бројот на вработените во органите на државната власт е само 12,2% од вкупната бројка вработени во јавниот сектор, односно 15 945 лица од вкупно 131 183.
Од анализата на податоците во извештајот за 2020 година произлегува дека најголем број на вработени се во дејностите образование 32%, здравство 19 %, управа 14%, комунални дејности на јавните претпријатија 9,6 отсто.
Во споредба со истиот период лани, бројот на вработените во јавниот сектор е намален и тоа за 1 717.
„Намалување на бројот на вработени има во органите на државната власт. Во 2019 година во органите на државната власт биле вработени 16 522 лица, а во 2020 година овој број е 15 945, што е намалување за 577 вработувања или 3 проценти. Но, ако како држава во 2020 година бележиме намалување на бројот на вработени во државниот апарат, тоа не е случај со вработеноста во институциите во некои од клучните сектори како здравството и во детската и социјалната заштита. Во овие сектори извештајот покажува зголемување на бројот на вработени. Тоа илустрира дека нови вработувања се прават онаму каде што за тоа има вистинска потреба“,
истакна Шаќири.
Во однос на образовната структура, во 2020 година е зголемен бројот на вработени лица со високи образовни квалификации. Повеќе од половината, односно 53,62% од вработените лица во јавниот сектор, имаат најмалку високо образование, а 2 660 се доктори на науки.
Во однос на родовата структура, процентот на жени вработени во јавниот сектор е поголем од процентот на мажи и тоа 54,83%, наспроти 45,17%.
Просечната возраст на вработените изнесува 46 години. Во однос на етничката припадност, на ниво на цел јавен сектор Македонците се застапени со 74,49%, Албанците со 20,85%, Турците со 2,18%, Ромите 1,40%, Србите се 1,16%, Бошњаците со 0,51% и Власите 0,49%.
Инаку и оваа година, иако тоа не претставува законска обврска, објавени се податоци и за бројот на вработени во акционерските друштва во државна сопственост и за лицата вработени преку агенциите за привремени вработувања.