Европските земји се соочуваат со нови дневни рекорди на заразени. Светската здравствена организација предупредува дека таквата висока стапка на пренос може да доведе до половина милион нови смртни случаи на континентот до февруари следната година
Во Холандија во изминатите 24 часа се регистрирани 10 272 нови случаи на инфекција со коронавирус, што е најмногу од јули годинава.
Во соопштението од Институтот за јавно здравје и животна средина се наведува дека во последните 24 часа низ државата имало 1 102 лица повеќе заболени со ковид-19 од претходниот ден и дека бројот на дневни случаи се зголемува од октомври.
Холандија има една од најбрзо растечките стапки на инфекција во Европа.
Холандскиот премиер Марк Руте пред два дена најави низа мерки во рамките на борбата против порастот на заразени со коронавирус во земјата, меѓу кои повторно е задолжително носење маска во затворени јавни простори како што се продавници.
Владата, исто така, повторно воведе физичка дистанца од 1,5 метар, додека задолжителното прикажување на здравствени сертификати ќе биде проширено на места како што се музеите и отворените делови од рестораните, рече Руте на прес-конференција во Хаг.
Тој ги повика граѓаните што повеќе да се одлучат за далечинско работење и да го избегнуваат градскиот сообраќај во шпиц-периодот.
Европските земји се соочуваат со нови дневни рекорди на заразени. Светската здравствена организација предупредува дека таквата висока стапка на пренос може да доведе до половина милион нови смртни случаи на континентот до февруари следната година.