Грчките здравствени власти претходно објаснија дека болеста се пренесува од човек на човек преку контакт со кожни лезии, телесни течности или контаминирани предмети на пациентот, како и преку респираторни капки по продолжен близок контакт на кратко растојание. Симптомите вклучуваат треска, главоболка, исцрпеност, а најчесто се појавува и карактеристичен осип еден до пет дена од почетокот на симптомите
Националната организација за јавно здравје на Грција (ЕОДИ) го испитува првиот сомнителен случај на мајмунски сипаници во земјата, а станува збор за турист од Англија, јави дописничката на МИА од Атина.
Од ЕОДИ кусо соопштија дека туристот, заедно со неговата придружничка, која е без симптоми, се хоспитализирани во атинска болница, а резултатите од земените примероци се испратени во лабораторија и ќе бидат достапни утре.
Според грчките медиуми, 29-годишниот Англичанец, заедно со неговата пријателка биле на одмор на Кефалониа, каде што му се појавиле првите симптоми, меѓу кои и осип на кожата. Од локалниот здравствен центар, со авион бил пренесен во атинската болница „Атикон“.
Националната организација за јавно здравје на Грција во петокот преку соопштение информираше дека во соработка со европските организации, но и СЗО внимателно ја следат ситуацијата и на граѓаните им препорача да ги следат упатствата на лекарите во случај на осип или невообичаено оштетување на кожата.
Објаснија дека болеста се пренесува од човек на човек преку контакт со кожни лезии, телесни течности и/или контаминирани предмети на пациентот, како и преку респираторни капки по продолжен близок контакт на кратко растојание, а симптомите вклучуваат треска, главоболка, исцрпеност, а најчесто се појавува и карактеристичен осип еден до пет дена по почетокот на симптомите.
Иако не постои специјална терапија, наведоа грчките здравствени власти, повеќето пациенти целосно закрепнуваат во рок од неколку седмици.
Од ЕОДИ посочија дека појавувањето случаи во Велика Британија без претходно патување, како и појавувањето спорадични случаи во други европски земји укажуваат на тоа дека болеста најверојатно се шири во заедницата. Исто така, нагласија дека врз основа на досегашните епидемиолошки податоци, опасноста за општата популација е низок, бидејќи болеста е обично лесна и се самоограничува, со релативно мало ширење.