Европската Унија, соочена со огромниот летен бран, препорача втора засилувачка вакцина против ковид-19 за сите лица постари од 60 години, наместо 80 години како досега
Епидемијата на ковид-19 се враќа во Франција веќе неколку недели, така што денеска се регистрирани 108 смртни случаи од вирусот, според најновите податоци на Јавното здравство во Франција. Во моментов се хоспитализирани 18 605 пациенти, од кои 176 се во критична состојба.
Европската Унија, соочена со огромниот летен бран, препорача втора засилувачка вакцина против ковид-19 за сите лица постари од 60 години, наместо 80 години како досега. „Препораката важи и за сите ранливи лица“, велат од Европскиот центар за превенција и контрола на болести и од Европската агенција за лекови (ЕМА) во заедничкото соопштение.
„Ги повикуваме земјите-членки веднаш да им понудат втори засилувачки вакцини на сите постари од 60 години и ранливите луѓе и ги повикуваме сите подобни луѓе да се пријават за вакцинација“,
изјави Европската комесарка за здравство, Стела Киријакидес.
Во април, двете здравствени агенции на ЕУ веќе ја препорачаа втората засилувачка доза, во повеќето случаи четврта доза, за постарите од 80 години, но сигнализираа дека може да следи проширување за лица над 60 години.
„Европа се соочува со зголемување на случаите со ковид, но и со нагорен тренд на бројот на хоспитализации или итни приеми во неколку земји, главно поради подваријантата БA.5 на омикрон, која е позаразна“,
истакна директорот на Европскиот центар за превенција и контрола на болести, Андреа Амон.
Претседателот на Научниот совет, Жан-Франсоа Делфраиси, кој предвидува врв на седмиот бран за идната недела, рече дека здравствениот систем на Франција „ќе издржи“ ова лето против варијантата БА.5. Тој потсети дека оваа подваријанта е „многу пренослива“, но „не е потешка“.
„Имаме болнички систем кој е уморен, ќе имаме многу движења на населението, вирусот ќе продолжи да циркулира, а понудата за нега ќе биде слаба затоа што ќе има одмори за болничкиот персоналот“,
рече Делфраиси.