Семејството починало минатата недела во домашни услови, а докторите не знаат како тие точно се заразиле
Тричлено семејство во една недела ја изгубило битката со ковид-19. Станува збор за татко, мајка и нивната триесет и шестгодишна ќерка, за кои карактеристично било што тројцата имале хронични заболувања.
„Имаме информација од минатата недела дека во домашни услови има тројца починати од едно семејство, од кои најмладата е 36-годишна жена со коморбидитети, била со обезитас и гинеколошки проблеми. Нејзините родители биле со тешки форми на болести, како канцер во терминална фаза кај таткото и кардиолошка болест кај мајката. Значи, генетскиот фактор и коморбидитетите се главниот проблем за смртни случаи при зараза со ковид-19“,
изјави за МИА д-р Миранда Пајазити од тетовската клиничка болница.
Од болницата велат дека немаат информации како се заразиле членовите на семејството.
„Немаме информации за начинот на кој се заразиле. Можно е да било поради групирање, не само свадби, имаше разни видови групирање кои може да доведат до заразување. Затоа апелираме да нема групирање, да нема никакви настани додека се смири ситуацијата. При првите симптоми, да прават контрола и тоа е многу добро. Сега во Клиничката болница нема многу членови од исто семејство кои се заразени, но во домашни услови има, а има и во поблага и во полоша форма. За жал, повеќето пациенти доаѓаат во терминална фаза од болеста ги кријат симптомите дома“,
објаснува докторката.
Изминатите 24 часа во тетовската болница имало два смртни случаи кај хоспитализираните пациенти, на 40 и 60-годишна возраст.
„Овие денови расте свеста и доаѓаат на прегледи. И тоа е добро, ќе помогне во намалување на бројот на заразени. Генетски фактор е многу значаен, а плус делта-варијантата на ковид има способност еден човек да зарази деветмина. Многу е посилен од минатиот“,
рече д-р Пајазити.
Сега во ковид-центарот има 108 хоспитализирани, од кои 106 се на кислородна поддршка и двајца се на неинванзивен респиратор. Новопримени се 14 лица, а испишани од болничко лекување се десет луѓе.