Наместо пристојност и етика, СДСМ и ДУИ решија да ја спасуваат коалицијата, реагира Владимир Ѓорчев од ВМРО-ДПМНЕ
Четиринаесет семејства се во црнина поради неодговорноста на премиерот Зоран Заев и министерот Венко Филипче, вели Владимир Ѓорчев, член на ИК на ВМРО-ДПМНЕ, како реакција на одлуката на премирот да не ги прифати оставките на министерот и заменик-министерот за здравство во врска со пожарот во модуларната болница во Тетово во кој загинаа 14 лица.
„Народот е револтиран, овој срам и брука во Македонија ќе заврши. А оние кои што се виновни ќе одговараат. Денес повторно видовме дека власта нема осет и нема жал за 14 луѓе што живи изгореа во ковид-болницата и вкупно 7 000 починати од ковид. Наместо пристојност и етика, СДСМ и ДУИ решија да ја спасуваат коалицијата. Четиринаесет луѓе живи изгореа во пластичниот киоск на Зоран Заев и Венко Филипче“,
рече Ѓорчев на денешната прес-конференција.
Според него, одговорност треба да има и за доцнењето на вакцините против ковид, но и за високата смртност на ковид-пациенти.
„Зоран Заев само што ќе отвори уста лаже, секогаш и секаде. Но, тоа македонската јавност го препознава. Немаше одговорност што последни добивме вакцини, немаше одговорност за 7 000 ковид-мртви, немаше одговорност за тоа што половина Македонија изгоре, авионите не беа летнати три години, а хеликоптерите беа без гориво. Немаше одговорност за овчарот што почина во Кратовско, немаше одговорност за тоа што сите белосветски мафијаши и трговци со дрога имаат македонски пасоши. Кај Зоран Заев нема одговорност туку само профитерство и коалиционен договор. Но, Македонија нема да го трпи ова, затоа што овде живеат пристојни луѓе кои нема да се согласат дека пластичната контејнерска болница изгоре за три минути. Не може таканаречена болница да изгори побрзо од картонска кутија за кондури. Тоа е ужасот во кој живееме. Додека во земјава умираа по 50 луѓе дневно, Заев и Филипче возеа мотори и од тие луѓе не очекуваме ништо, но очекуваме да бидат поразени“,
рече Ѓорчев.
Ѓорчев рече дека во земјава повеќепати имало примери на оставки на министри или јавни функционери кои потфрлиле во својата работа, но обвини дека такво нешто досега не случило ниту една во Владата на Зоран Заев.
На новинарско прашање кои се тие министри што во времето на владата на ВМРО-ДПМНЕ дале оставки, притоа потсетувајќи го Ѓорчев дека и тогаш министри понудуваа оставки, но не беа прифатени од тогашниот премиер, тој рече дека ќе подготват листа за јавноста на која ќе ги набројат сите примери. Во тој контекст рече дека во 2015 година, раководството на Министерството за внатрешни работи си поднело оставка.
„После 7 000 мртви од ковид, Зоран Заев сè уште не го разрешува Венко Филипче. Педесет семејства си ги закопуваат блиските затоа што Македонија има најголема смртност во светот од ковид. Катастрофата во која живееме е тоа што кога ќе умрат 17 луѓе во еден ден тоа веќе и не е вест…Имаме смртност која е најголема од Втора светска војна наваму. Никогаш не било вака во Македонија…Сите знаеме дека во било која друга европска земја ќе имаше најмалку десет оставки“,
додаде Ѓорчев.