Неофицијално, станува збор за судијата Ѓоко Ристов, а предметот се поврзува со минатомесечното апсење на адвокатот и поранешен државен правобранител Фехми Стафа
Во рамки на обемна истрага на Основното јавно обвинителство за гонење организиран криминал и корупција (ОЈО ГОКК) денеска во домот на родителите на судија од Апелацискиот суд Скопје, во Неготино, при претрес се пронајдени 350 000 евра кои биле соѕидани во простор во ѕидот, информираат од ОЈО ГОКК. Неофицијално, станува збор за судијата Ѓоко Ристов.
Од ОЈО ГОКК соопштуваат дека сомнежите се дека пронајдените пари се незаконски стекнати, а постапката која резултираше со денешните претреси е проширување на истрагата иницирана на 14 декември, кога беше осомничен адвокатот и поранешен државен правобранител Фехми Стафа за кривичното дело „Примање награда за противзаконито влијание“.
„Станува збор за една од најопсежните истраги поради сомненија за висока корупција во нашата држава досега, која е поткрепена со информации и известувања од Агенцијата за национална безбедност. Дејствијата координирани од јавниот обвинител ги преземаат припадници на Одделот за борба против организиран криминал при Министерството за внатрешни работи и Управата за финансиска полиција“,
велат оттаму.
Поранешниот државен правобранител Стафа беше уапсен на 13 декември минатата година, во рамките на постапка што против него ја поведе Основното јавно обвинителство за гонење организиран криминал и корупција (ОЈО ГОКК), поради основано сомнение дека сторил кривично дело примање награда за противзаконито влијание.
Како што информираа тогаш од Обвинителството, во периодот од октомври до 13 декември, осомничениот Стафа примил вкупно 50 000 евра за да посредува и да влијае кај судија во Апелацискиот суд Скопје во врска со предмет што се водел против негов клиент, односно лице што го застапувал како адвокат. Намерата, според ОЈО ГОКК, била преку поткуп да се влијае врз извршување службено дејствие кое не смеело да биде преземено.
Непосредно по примањето на парите, осомничениот Стафа беше лишен од слобода, при што кај него биле пронајдени и одземени паричните средства. Инаку, лицето за кое поранешниот државен правобранител требало да издејствува укинување на мерка притвор е осомничениот во случајот „Синџир“, Љупчо Пецов, познат по прекарот Ѓаволот.
Стафа, кој е адвокат на Пецов во овој случај, неколку месеци претходно поднел барање за замена на мерката притвор со куќен притвор во отсуство на Пецов, за што била понудена и гаранција.
Неколку дена по апсењето на Стафа, поточно на 16 декември, Пецов, кој дотогаш беше во бегство, самиот им се предаде на органите на прогонот и веднаш беше изведен пред судија на претходна постапка.
Мерката притвор, што на Пецов претходно му беше изречена и потврдена од скопска Апелација, Кривичниот суд тогаш му ја замени со куќен притвор.
Од Основниот кривичен суд Скопје тогаш рекоа дека мерката е заменета на предлог на ОЈО ГОКК бидејќи тој самиот се пријавил на органите на прогонот, како и поради тоа што надлежниот јавен обвинител оценил дека во притворското одделение не може да се гарантира неговата лична безбедност.
Тогаш остана нејасна улогата на апелациониот судија во овој случај.