Градоначалничката на Скопје го повика Обвинителството да се одважи и да постапи во врска со дивоградбите во Чаир, за, како што рече, да не биде ставено во функција на политички промотор на власта и да не биде инструментализирано како пи-ар на ВМРО-ДПМНЕ и ВЛЕН
Градоначалничката на Град Скопје, Данела Арсовска, го повика Јавното обвинителство да постапи во врска дивоградбите во скопски Чаир. Апелира Обвинителството итно да обезбеди докази од Општината бидејќи, според нејзини информации, таму активно се уништуваат докази за фалсификатите и дивоградбите.
„Јавното обвинителство и правосудната полиција за сторено кривично дело дознаваат со непосредно забележување, по допрен глас или кривична пријава. Досега пријави за дивоградби Јавното обвинителство има добиено писмено, по допрен глас, а редовно е пријавувано и во полиција“,
пишува Арсовска во објавата на Фејсбук.
Градоначалничката го повика Обвинителството да се одважи за да не биде ставено во функција на политички промотор на власта и да не биде инструментализирано како пи-ар на ВМРО-ДПМНЕ и ВЛЕН.
„Во Чаир има повеќе од 150 документирани, утврдени дивоградби кои се спротивно на закон градени сега, а не во 2011 година, без или со фалсификувани документи. Во овие објекти живеат илјадници граѓани чиј живот е во постојана опасност бидејќи тие објекти немаат соодветна документација, надзор, пресметана статика, хидрантски мрежи, итни излези, план за евакуација, паркинзи и пристап до објектите“,
додава скопската градоначалничка.
Основното јавно обвинителство (ОЈО) Скопје во вторникот информира дека веќе постапува во врска со сомненијата за дивоградби во скопски Чаир по доставено известување од страна на СВР Скопје.