Двете земји ги ставија на листа вакцините што се признаени од здравствените власти: Британија не ја признава „спутник“, а Франција ниту „спутник“ ниту кинеските „Синофарм“ и „Синовак“
Со новите ковид-протоколи во Обединетото Кралство на Велика Британија и Северна Ирска целосно вакцинираните лица, согласно утврдените британски правила за вакцина-сертификат, повеќе нема потреба да прават тест за ковид-19 ниту пред ниту откако ќе пристигнат во Британија. Но, останува обврската за пополнување на формуларот за лоцирање на патници.
„Обединетото Кралство го прифаќа нашиот сертификат за примени вакцини, за оние кои ги признава (‘Модерна’, ‘Новавакс’, ‘Астра Зенека’, ‘Фајзер/Бионтек’, ‘Синофарм’ и ‘Синовак’), а дигиталниот сертификат за ковид на ЕУ за нашите граѓани ќе почне да го признава од 28 февруари оваа година. Дополнително, невакцинираните лица се сметаат оние без ниту една или само со една вакцина (освен ако е ‘Модерна’) или лица кои имаат примено вакцина чиј сертификат не се признава во Обединетото Кралство, на пример ‘спутник’“,
велат од МНР.
Исто така, од МНР потсетуваат дека државјаните на Република Северна Македонија за влез во Обединетото Кралство на Велика Британија и Северна Ирска (ОК) им е потребна важечка британска виза или дозвола за престој.
Државјани на Република Северна Македонија може да влезат во Франција, пак, доколку се вакцинирани, односно примиле една од следниве вакцини: „Фајзер’, „Модерна“, „Астра Зенека“ и „Џонсон и Џонсон“ (вакцини признати од Европската агенција за лекови (EMA), 28 дена од „Џонсон и Џонсон“, седум дена од трета доза вакцина „Фајзер“ за лицата кои претходно примиле вакцина која не е призната од EMA. Исто така, треба да се приложи потврда за статусот на вакцинација.