Во Битола речиси секој ден од почетокот на април се регистрираат повеќе од 100 нови случаи на ковид-19
Драстично е зголемен бројот на заболени од ковид-19 во Битола. Според извештаите на Министерството за здравство за период од околу десет дена бројот на активни случаи на ковид-19 во градот е зголемен двојно.
На 29 март во Битола имало вкупно 622 активни случаи, додека денеска оваа бројка изнесува 1 246 активно болни лица. Ова е најголем број на активни случаи после Скопје, кој предничи пред останатите градови во земјава со 10 830 активни случаи на ковид-19.
Во Битола каде досега се регистрирани вкупно 5 130 случаи на ковид-19, речиси секој ден од почетокот на месец април се регистрираат повеќе од 100 нови заболени. Сто нови случаи се регистрирани и во последните 24 часа. Само во април регистрирани се 711 нови случаи на ковид-19.
Зголемен е и бројот на хоспитализирани лица, а во моментов во ковид-центарот во Битола се лекуваат 134 пациенти позитивни и сомнителни на ковид-19. Дел од болничките одделенија се затвораат и се одлагаат сите интервенции што не се итни, а медицинскиот кадар е фокусиран кон лекување ковид-пациенти.
Дека Битола во моментот е најголемо жариште на ковид- 19, неодамна посочи и претседателот на Комисијата за заразни болести Жарко Караџовски, кој рече дека базичниот репродукционен број RО кој покажува колку лица може да зарази еден заболен, изнесува 1,48 и е највисок во државата.
Според последните статистики на Министерството за здравство, после Битола најголем број активни случаи на ковид-19 има во Куманово каде во моментов има 1 202 активно болни од ковид-19 и Прилеп каде има 1 063 активни случаи.
Бројката е голема и во Охрид – 853, Велес-798, Кавадарци -721 и Тетово каде има 689 активни случаи. Понатаму следуваат Гостивар со 527 активни случаи, Штип со 496 случаи, Струмица – 478, Гевгелија – 413, Неготино – 349, Кичево – 295, Струга – 286, Кочани – 283, Ресен – 228, Радовиш – 148, Берово – 138, Свети Николе – 137, Крушево – 123, Валандово и Делчево – 105, Крива Паланка – 104 и Виница каде има 100 активни случаи.
Двоцифрен број на активно болни од ковид-19 има само во Пробиштип – 81, Богданци -71, Демир Капија -63, Дебар -55, Македонски Брод – 48, Демир Хисар – 47, Кратово и Пехчево – 26, Дојран – 16 и Македонска Каменица каде има 14 активни случаи.
Вкупната бројка на дијагностицирани лица со ковид во земјава од почетокот на епидемијата изнесува 138 891, бројката на оздравени пациенти е 112 619, на починати е 4 108, а бројот на активни случаи изнесува 22 164.