Од МВР информираат дека на Саитов му е одреден екстрадициски притвор и дека следува постапка помеѓу министерствата за правда на двете држави за негова екстрадиција во Македонија, каде што треба да биде изведен пред надлежните правосудни органи
Осумнаесетгодишниот Саит Саитов, кој на почетокот на јануари со автомобил прегази повозрасна жена во скопски Капиштец и побегна надвор од државата, е уапсен во Белград, каде што му е одреден екстрадициски притвор.
Известувањето за апсењето на Саитов од надлежните служби во Србија до македонското Министерство за внатрешни работи стигнало вчера, соопштија денеска од МВР.
„На 11.02.2026 од страна на надлежните служби во Србија известени сме дека во Белград е лишен од слобода Саит Саитов од Скопје, кој се бара со меѓународна потерница, распишана од македонското МВР, под сомнение за извршени тешки кривични дела против безбедноста на луѓето и имотот во сообраќајот и неукажување на помош на лице повредено во сообраќајна незгода“, за кривично-правен настан кој се случи во Скопје на 09.01.2026“,
се наведува во соопштението на МВР.
Оттаму додаваат дека на Саитов му е одреден екстрадициски притвор и дека следува постапка помеѓу министерствата за правда на двете држави за негова екстрадиција во Македонија, каде што треба да биде изведен пред надлежните правосудни органи.
Сообраќајката за која е обвинет Саитов се случи на 9 јануари во скопската населба Капиштец, кога тој со автомобил „фолксваген пасат“, сопственост на неговиот татко, удри во 79-годишната Љуба Јаковлеска и побегна од местото на несреќата. Жената кратко време по настанот им подлегна на повредите, а момчето заедно со неговиот татко, помогнати од уште две лица, уште истиот ден ја напуштиле државата.
Основното јавно обвинителство Скопје на 17 јануари соопшти дека поднело обвинение против две лица, маж и жена, кои му помогнале на 18-годишникот да побегне од државата. Двајцата соизвршители се товарат за кривичното дело помагање на сторител по извршено кривично дело, казниво според член 365 од Кривичниот законик.
Како што информираа тогаш од Обвинителството, додека траел увидот на местото каде што се случи сообраќајката, тие со автомобил марка „мерцедес“ со скопски регистарски таблички дошле до домот на осомничениот, го зеле и заедно со неговиот татко итно се упатиле кон граничниот премин „Табановце“, каде што непречено влегле во Република Србија, оставајќи ги бегалците. Откако ги оставиле во Србија, помагачите се вратиле во земјата истиот ден околу полноќ.
На 12 јануари Министерството за внатрешни работи распиша меѓународна потерница по Саитов.
Претходно од ОЈО Скопје соопштија детали во врска со сообраќајката, според кои 18-годишникот возел непрописно и без важечка возачка дозвола. Додека го возел „пасатот“ на татка си по улицата „Народен фронт“ во Скопје, тој непрописно се поместил во лево, на коловозната лента наменета за сообраќај од спротивната лента и се движел со неприспособена брзина, по што удрил во 79-годишната Јаковлеска, која се движела пеш.