Зијадин Села во интервју за ТВ Алсат упати повик до структурите и членовите што до вчера биле со Арбен Таравари, а не ја заборавиле каузата на Алијанса за Албанците, да се вратат и да ги туркаат процесите напред, но без Таравари
Најмалку што Арбен Таравари може да направи во овој момент, за да ја признае својата грешка, е да поднесе оставка. Ова во интервју за ТВ Алсат го изјави Зијадин Села, претседателот на Алијанса за Албанците (AA).
Села смета дека Таравари не треба да биде пречекан со раширени раце во „Европскиот фронт“ поради неговите сомнителни политички потези.
„Јавното извинување на еден политичар е оставка од функцијата затоа што, ако го направи тоа, ќе разбереме дека размислил и сфатил дека направил грешка. Но, ако не го направи тоа, тогаш ќе разбереме дека не се покајал, туку само облекол друга кожа за подоцна да ни сервира нешто што не е добро ниту за општеството во целина, ниту за граѓаните, особено за Албанците“,
рече Села.
Села рече дека имало барања за комуникација од партии од власта, додавајќи дека одговорил на едно такво барање.
„Имаше доста барања да воспоставам комуникација со овој или оној и на едно барање одговорив и ги искажав ставовите како што ги кажувам и тука. Ние не даваме збор на две страни, ниту јас, ниту АА која ја водам, ниту нејзините пратеници. Сериозни сме и не играме на две маси“,
нагласи Села.
Села упати повик до структурите и членовите што до вчера биле со Таравари, а не ја заборавиле каузата на АА, да се вратат и да ги туркаат процесите напред, но без Таравари.
„Реобединување на АА како опција – АА што ја водам јас има место за сите членови што не ја заборавиле каузата на АА и сме отворени за сите нив. Но, луѓето кои повеќе од десет пати ја претопиле АА во ВЛЕН со јавни изјави дека АА ќе се претопи во ВЛЕН, мислам дека никогаш не сакале повторно обединување и силна АА. Тоа најдобро ги покажува нивните цели – да ја претопат АА, да ја избришат нејзината ознака, името и каузите што ги градела со години, од кои дел ги реализирала и кога била дел од мнозинството, но и од опозицијата. Со исклучок на оваа Алијанса, која повеќе од десет месеци е во Влада, нема дадено никаков резултат од политичката програма на АА… АА е отворена за сите нејзини поранешни членови, но оној што ја подели – за него не треба да има место во АА”,
додаде тој.