Во акцијата учествуваа над 2 500 работници од јавните претпријатија, општествено одговорни компании, а помош пристигна и од другите општини во земјава
Седумдесет и двачасовната акција за чистење на Градот Скопје заврши успешно, рече градоначалникот на Град Скопје, Орце Ѓорѓиевски, на прес-конференција одржана во централното градско јадро. Тој рече дека иако на почетокот состојбата изгледала нереална, пред сè поради фактот што јавните претпријатија, машините и механизацијата биле десеткувани, имајќи предвид дека во моментот кога Ѓорѓиевски ја презел функцијата имало само 16 функционални камиони во ЈП „Комунална хигиена“, сепак после три дена работа, според него, може да се констатира дека градот е исчистен. Тој рече дека сега на располагање има 40 камиони, а тенденцијата е до петок оваа бројка да се зголеми на 60.
Во однос на процесот, кажа дека се собрани над 4 500 тони отпад или околу четири до пет пати повеќе отпад отколку што се собира во секој вообичаен викенд, што говори за таложењето на депониите и мини-депониите створени низ сите населби во градот. Учество земале над 2 500 работници од јавните претпријатија, а Ѓорѓиевски рече оти нема да запре чистењето и во периодот што следува оти нема да дозволи повторно Скопје да живее во смет како изминатите години.
„Освен што домаќинствата беа опфатени, знаете дека и речното корито на Вардар го чистевме. Првпат по десет години ги исчистивме островите кои беа формирани од отпад, плоштадот не беше испран долго време, а сега се истретира соодветно. Кејот се третира, како и Градскиот парк и сите други места што беа симболика за срам“,
кажа градоначалникот.
Градоначалникот на Град Скопје рече оти во акцијата биле изречени над четириесет казни и седумдесет опомени за физички и правни лица и најави оти такви санкции ќе следуваат и за секој што во иднина ќе го одлага отпадот на несоодветен начин.
„Дополнителна отежителна околност беше што добивме впечаток дека половина Скопје се реновира, па мораше да се постапува дополнително на микролокации отстранувајќи мебел. Ќе спроведуваме акции за собирање на кабаст отпад и ќе бидат редовни, кога има алармантна состојба во некое домаќинство, ние ќе постапиме, но доколку некој несоодветно се однесува, како што тоа беше случај изминатите 72 часа ќе пристапиме кон изрекување опомени и казни“,
заклучи Ѓорѓиевски.