Краткотрајниот притвор, велат од Обвинителството, е неопходен заради прибирање докази, анализа на веќе собраниот обемен доказен материјал и завршување на вештачењата
Околу шест килограми амфетамин се откриени и запленети во акција на Основното јавно обвинителство Скопје и Министерството за внатрешни работи (МВР) спроведена вчера во Скопје и Куманово.
Во акцијата, како што соопштија попладнево од Јавното обвинителство на Република Северна Македонија, се уапсени шест лица за кои постојат сомневања дека ја набавувале и продавале дрогата.
Според Обвинителството, тие се товарат дека заеднички извршиле продолжено кривично дело неовластено производство и пуштање во промет наркотични дроги, психотропни супстанции и прекурсори од член 215 став 3 во врска со став 1 и во врска со член 45 од Кривичниот законик.
Предистражната постапка на Основното јавно обвинителство Скопје заедно со Министерството за внатрешни работи траела неколку месеци, а дел од доказите, како што се наведува биле обезбедни со примена на посебни истражни мерки.
По обезбедените докази во предистрагата, полициски екипи вчера со обезбедени судски наредби извршиле претреси на повеќе локации во Скопје и Куманово за целосно разоткривање на лицата вмешани во нелегалната трговија со дрога и нивните активности кои, според Обвинителството, траеле подолг временски период.
„Согласно обезбедените докази, постои сомнение дека тие заедно со умисла извршиле повеќе временски поврзани дејствија што претставуваат повеќекратно остварување на исто дело, искористувајќи ист траен однос и исти прилики, така што претходно неовластено набавувале, држеле и продавале психотропна супстанца – амфетамин, кој е класифициран во Националната листа II на контролирани психотропни супстанции, како и 3,4-метилен-диоксиметамфетамин (MDMA) – психотропна супстанца, класифициранa во Националната листа I на контролирани психотропни супстанции“,
се наведува во соопштението од Обвинителството.
При претресите покрај околу шест килограми амфетамин, биле пронајдени и повеќе таблети, пакувања со растителна материја, како и други предмети кои се дадени на вештачење по наредба на јавен обвинител.
За сите шест уапсени лица надлежниот јавен обвинител до судија на претходна постапка од Основниот кривичен суд Скопје денеска доставил предлог да им биде одреден краткотраен притвор од 48 часа.
Краткотрајниот притвор, велат од Обвинителството, е неопходен заради прибирање на докази, анализа на обемниот доказен материјал и за завршување на вештачењата.