Ова следува по реакциите во јавноста, меѓу кои и на опозицискиот СДСМ, дека по претресот во домот на директорката на СОУ „Крсте Петков Мисирков“, Маја Лозановска, полицискиот началник инсистирал таа да биде однесена на разговор во станица и покрај тоа што во моментот била на боледување и не се чувствувала добро, а дополнително бидејќи Обвинителството не издало наредба за приведување
Оделот за внатрешна контрола при Министерството за внатрешни работи (МВР) го испитува постапувањето на полициските службеници за време на синоќешниот претрес во домот на директорката на СОУ „Крсте Петков Мисирков“ во Демир Хисар, Маја Лозановска.
Ова следува по реакциите во јавноста, меѓу кои и на опозицискиот СДСМ, дека по претресот, полицискиот началник инсистирал Лозановска да биде однесена на разговор во станица и покрај тоа што во моментот била на боледување и не се чувствувала добро, што се гледа и од објавената видеоснимка од настанот.
Притоа, во барањето на ОЈО Битола за претрес во нејзиниот дом не се споменува дека директорката треба да биде приведена или повикана на итен распит во полициска станица, како што инсистирал полицискиот началник.
„Во однос на реакциите на јавноста поврзани со постапувањето на полициските службеници за време на претресот, Одделот за внатрешна контрола,криминалистички истраги и професионални стандарди презема соодветни мерки и активности од своја надлежност за што дополнително ќе ја известиме јавноста“,
велат од МВР.
Оттаму додаваат дека поради сомнение за кривично дело „одземање или уништување службен печат или спис“, врз основа на наредба на Основниот суд Битола вчеравечер, во присуство на адвокат, бил извршен претрес во домот на М.Л. (57) од Демир Хисар, а потоа и во службените простории во средно училиште кои ги користи.