Случајот со осветувањето на новите полициски возила предизвика реакции во јавноста, а денеска за настанот се огласи и заменик-министерот за внатрешни работи, Астрит Исени, кој во објава на неговиот фејсбук-профил напиша дека „прскањето со света вода од страна на верско лице врз службените полициски возила и врз службените објекти, во рамки на паркингот на МВР, не претставува приватен верски чин, туку директно кршење на принципот на секуларна држава и на законот“
По фотографиите што се појавија на социјалните мрежи на кои се гледа како свештено лице „осветува“ дел од новите полициски возила што беа промовирани на крајот на минатата година, Одделот за внатрешна контрола при Министерството за внатрешни работи (МВР) потврди дека се води истрага што треба да утврди кој го викнал свештеникот во кругот на Министерството за да го изврши чинот.
„Министерството за внатрешни работи ве известува дека Одделот за внатрешна контрола, криминалистички истраги и професионални стандарди при МВР презема соодветни мерки и активности за целосно утврдување на околностите, по што јавноста ќе биде соодветно информирана“,
изјавиле за ТВ Сител од Министерството.
Случајот со „осветувањето“ на новите полициски возила предизвика реакции во јавноста, а во врска со настанот се огласи и заменик-министерот за внатрешни работи, Астрит Исени, кој во објава на неговиот фејсбук-профил напиша дека „прскањето со света вода од страна на верско лице врз службените полициски возила и врз службените објекти, во рамки на паркингот на МВР, не претставува приватен верски чин, туку директно кршење на принципот на секуларна држава и на законот“.
Како што наведува тој, чинот бил извршен од неколку припадници на една сообраќајна полициска единица, а во соработка со свештеното лице, и во никој случај не го претставува институционалниот став или дејствувањето на МВР.
Исени, во тој контекст, додава дека овој случај укажува на ниско ниво на професионална свест кај дел од полициските службеници.
„Уставот на Република Северна Македонија (член 19) јасно ја утврдува одвоеноста на верските заедници од државата. Законот за полиција бара целосна и безусловна неутралност. МВР е државна институција која мора да им служи на сите граѓани без разлика на верската припадност. Службените простории и средства не се сопственост на ниту една верска заедница и не смеат да се користат за верски ритуали или активности. Полицијата е во служба на сите граѓани и не смее да постапува со двојни стандарди“,
вели заменик-министерот за внатрешни работи во објавата.
Наведувајќи дека МВР има јасни внатрешни правилници, Исени најавува дека, согласно нив, на одговорност ќе бидат повикани сите што го организирале или го дозволиле овој чин, не го спречиле неговото извршување и овозможиле влез на свештено лице во објектите на МВР за вршење верски активности.
„Почитувањето на верските убедувања е неопходно, но мешањето на религијата со безбедносните институции е неприфатливо и опасно за еднаквоста, институционалната неутралност и довербата на граѓаните. Државата е секуларна. Полицијата е на граѓаните. Законот е над секој верски симбол“,
пишува Исени.
Новите 120 возила од марката „пежо 408“, наменети за полициските службеници, беа промовирани на 26 декември минатата година во кругот на МВР, а на свеченоста покрај министерот за внатрешни работи Панче Тошковски присуствуваше и премиерот Христијан Мицкоски.
Ресорниот министер Тошковски тогаш информира дека возилата ги имаат сите современи технолошки карактеристики за да одговорат на сите предизвици како секоја друга полиција во светот.