Предлог-законот кој е отворен за коментари на ЕНЕР предвидува администрацијата во петоците да работи само четири часа. Заев денеска во изјава, пак, рече дека неговиот став е оти како народ треба да работиме повеќе
СДСМ ги гледа анкети како губи, и затоа тресе ветувања како од ракав, без анализа, реагираа од ВМРО-ДПМНЕ на денешната изјава на премиерот Зоран Заев во врска со изјавата за скратеното работно време на администрацијата.
„Ветуваат и што е можно и што не е. Ветуваат без да направат поопсежна анализа. Заев едно збори министерката друго, тоа е немање јасен концепт и план за развој на државата, не знаат што прават, ниту кај тераат. Затоа со нив само тоа може да се очекува хаос и неспособност, истото што го гледавме до сега. Иднината мора да е подобра од ова тие што го направија. И може да е подобра“,
велат од ВМРО-ДПМНЕ во реакцијата.
Предлог-законот за административните службеници, кој е објавен на ЕНЕР и уште неколку дена е отворен за коментари, е под надлежност на Министерството за информатичко општество и администрација и тој превидува администрацијата во петок да работи само четири работни часа наместо осум.
Заев, пак, денеска рече дека ова било предизборно ветување на коалициските партнери во владата и затоа сега прашањето е отворено за дискусија. Меѓутоа, неговиот став рече дека е оти треба повеќе да работиме како народ.
„Ги знаете моите ставови и за севкупната продуктивност на населението и севкупната продуктивност и ефикасност на администрацијата. Како народ, треба повеќе да работиме, а не помалку. Но, како ветување предизборно на политичките партиципиенти во власта тоа е ставено на ЕНЕР и допрва ќе се отвора дискусија за ова прашање. Верувам дека граѓаните ќе си кажат тоа што е реалноста во државата, а реалноста е дека сите, ако сакаме швајцарски плати, треба да работиме многу повеќе од таа продуктивност што денеска ја имаме, почнувајќи од себе, па секако до сите работници во приватниот и во јавниот сектор“,
вели Заев.