Реформи во образованието и зголемување на платите на наставниците и универзитетските професори, се дел од предизборните ветувања на ВМРО-ДПМНЕ за кои денеска на прес-конференција зборуваше Весна Јаневска.
„Наставниците ќе добијат повисока плата како мотив за нивната работа, достојна за нивниот труд кој го вложуваат во образованието на најмладите од кои ќе се продуцираат нашите научници, нашите политичари, нашите филозофи, нашите доктори. Платата на наставниците ќе биде според колективниот договор, ќе има израмнување и таа ќе изнесува 36 000 денари. Тука да не ги пропуштам професорите, како што веќе слушнавте, платата на универзитетските професори ќе достигне до 100 000 денари“,
рече Јаневска.
Таа вели дека во основното образование ќе направат реформи на наставните планови и програмите и ќе ги растоварат децата од заморно учење, а за наставниците ќе има растоварување од огромната административна работа.
Дуално средно образование во функција на стопанството, поддршка на научни истражувачки проекти, се дел од ветувањата кои ги дава опозициската партија.