СДСМ денеска достави документи до ДКСК и побара антикорупционерите да постапат во врска со случајот со тендерската постапка за униформи за специјалните единици на Министерството за внатрешни работи
Откако ја оставија без елементарни услови за работа, СДСM сега е против опремување на полицијата со униформи, реагираат од владејачката ВМРО-ДПМНЕ откако од Бихаќска ги повикаа Јавното обвинителство и Државната комисија за спречување на корупцијата (ДКСК) да постапат за „скандалозниот тендер“ во МВР од 4 милиони евра.
„СДС го имаше најдолгогодишниот министер за внатрешни работи, Оливер Спасовски, кој не најде време на полициските припадници да им набави униформи и нова опрема. Во време на СДС кој сега, без срам, зборува за наводни криминални тендери, полицајците беа принудени сами да си крпат, шијат или позајмуваат делови од униформи од пензионирани колеги. Со доаѓањето на Панче Тошковски на чело на МВР, со конкретни решенија, подобри услови, нови униформи и нова опрема почна, постепено се враќа достоинството на полициските службеници“,
посочија од ВМРО-ДПМНЕ.
Оттаму додаваат дека тендерската постапка за набавка на униформи за специјалните единици е спроведена согласно сите законски прописи, имајќи го предвид интересот на министерството, водејќи се од квалитетот и најниската цена, а исто така овозможувајќи фер пристап за поголема конкуренција.
„Друга важна компонента на договорот е рамковната спогодба која не предизвикува директна финансиска обврска за министерството, што значи дека исплатата ќе се прави согласно потребите и динамиката на испорака на униформите. Со заминувањето на СДС во опозиција, заврши и времето на неказнивост, хаос и наместени тендери. Сега е време на одговорност и на почитување и спроведување на законот“,
порачаа од владејачката партија.
СДСМ денеска достави документи до ДКСК и побара антикорупционерите да постапат во врска со случајот со тендерската постапка за униформи за специјалните единици на Министерството за внатрешни работи.