И три дена откако хеликоптер на МВР се користеше како такси за Заев нема одговорност од Спасовски, реагираат од ВМРО-ДПМНЕ во соопштение до јавноста. Од партијата го повикаа министерот за внатрешни работи да каже колку чини летањето со хеликоптер и обвинија дека наместо да се користи за превоз на ковид-пациенти, со него се превезуваат владини функционери.
„Спасовски наместо да пушти хеликоптер за некој од скоро 4.000 починати од КОВИД 19, кои ја изгубија битката со оваа болест, често и заради задоцнето примање во болница, тој го претвори хеликоптерот од МВР во такси на Заев. Хеликоптерот не летна ниту еднаш за ниту еден ризичен случај, но лета за Заев и Филипче. Смешни се обидите на Заев за вадење од калта во која сам потона. Доколку хеликоптерот на МВР е поефтино превозно средство од автомобилите, тогаш очекуваме тој веднаш да биде ставен на располагање на болниците низ државата, и да транспортира пациенти, наместо владини функционери. Доколку не е поефтин, што е и реалноста, Спасовски да каже колку ја чинеше државата летањето на Заев? Дали летањето на Заев чинеше 1.000.000 денари? И зошто тие пари наместо во борба против пандемијата се потрошија за хирот на Заев?“,
се вели во партиското соопштение.