Со укинување на печатените учебници и воведување дигитални, министерката за образование Мила Царовска ја спроведува најдлабоката социјална поделба и дискриминација во државата, вели пратеникот Игор Здравковски од ВМРО-ДПМНЕ.
Според него, образованието веќе нема да биде бесплатно, а социјалната нееднаквост меѓу учениците ќе се зголемува, со тоа и нерамноправноста и врсничкото насилство, кое и онака е присутно во нашите училишта.
„Со оглед на тоа дека и самата Царовска кажува дека 1 300 ученици немаат струја, стотици ученици учат алтернативно, на телевизија и со земање печатени материјали од училиштата, стотици немаат уреди за следење на онлајн настава, таа треба да е сосема свесна дека околу 25 000 ученици остануваат на милост и немилост на судбината и финансиската немоќ на нивните родители, од проста причина што овие ученици се припадници на најранливите категории на граѓани. Учебниците наместо МОН, според Царовска, ќе треба да ги печатат училиштата, кои од задолжените општини не можат да обезбедат финансии ниту за најосновните потреби, па оттука учебниците ќе паднат на товар на родителите. На оние истите родители кои немаат струја, немаат интернет, а не пак компјутер за своите деца“,
вели Здравковски.
Тој смета дека со овој потег се прави нехуман експеримент врз идните генерации, а под превез на модернизација на образованието. Вели дека без класична книга нема вовед во знаење ниту, пак, образованието ќе биде успешно.
„Книгата постои и во оние најмодерни земји во кои дигиталната книга е опција и за учење и за читање. За нашата Македонија, книгата е насушна потреба и неа нема право никој да му ја одземе. Нема право таа да ни ги осакатува децата ниту, пак, Владата, со никакви наводно модерни, а всушност лажни реформи, со трошење туѓи пари“,
додаде Здравковски.
Министерката Царовска, пак, по најавата дека од идната година ќе се користат дигитални учебници за учениците од четврто до деветто одделение, како и за средношколците уверува дека ќе остане можноста за учениците да учат и од печатени учебници на трошок на училиштето.
„Доколку од кои било причини некој ученик не е во можност да ги користи електронските учебници, училиштата имаат должност да ги испечатат и во хартиена форма да им ги доделат книгите, што значи материјалите за учење ќе му бидат достапни на секој ученик. Понатаму, секое училиште ќе има обврска да обезбеди потребната количина ИТ-уреди. Тие ќе се даваат на користење на учениците што не поседуваат електронски уред за употреба на дигиталните учебници. Ова значи дека државата ќе биде одговорна секое дете да има пристап до уред“,
соопшти Царовска.