За разлика од СДСМ/ДУИ, ние нема да навлегуваме во стапицата на националистички тези и романтизми кои ги користат за да го покријат криминалот кој се одвива во позадина, се вели во партиското соопштение на опозицијата
ВМРО-ДПМНЕ реагираше на вечерашната изјава на вицепремиерот Артан Груби во неговото гостување во емисијата „Клик плус“ на ТВ21, посочувајќи дека како партија нема да „навлегуваат во стапицата на националистичките тези“.
Груби изјави дека Мицкоски се согласил Албанец да биде премиер во последните 100 дена пред парламентарните избори, а ВМРО-ДПМНЕ пак го повика вицепремиерот да потврди дека ДУИ прифатиле предвремени парламентарни избори кои би се одржале следната година.
„Добро би било Артан Груби да излезе и да каже дека ДУИ прифати предвремени парламентарни избори следната година. За разлика од СДСМ/ДУИ, ние нема да навлегуваме во стапицата на националистички тези и романтизми кои ги користат за да го покријат криминалот кој се одвива во позадина. Имајќи го предвид скромниот капацитет на Артан Груби и неговата политика на сеење омраза, поделби и национализам не очекуваме поинаков пристап од веќе видениот на рекла казала политики“,
се вели во реакцијата на ВМРО-ДПМНЕ.