Според владејачката партија, СДСМ со години го оштетувал државниот буџет за лични и партиски интереси, па поради тоа денес не може да држи прес-конференции за подобар животен стандард и економија
СДСМ нема кредибилитет да зборува за економски политики со ова раководство и со излитени кадри, соопштија денеска од ВМРО-ДПМНЕ како реакција на прес-конференцијата на портпаролката на СДСМ, Богданка Кузеска, која ја обвини Владата за растечка инфлација и за влошен животен стандард.
Кузеска во своето обраќање рече дека во буџетот за 2026 година не е предвидено зголемување на минималната плата на 500 евра поради што платите и пензиите нема да растат, а ќе растат само трошоците за живот и, како што додаде, „стандардот на профитерите“.
Од ВМРО-ДПМНЕ одговорија на оваа прес-конференција со порака дека народот на изборите му ја испорачал реалноста на СДСМ.
„Доколку граѓаните беа навистина незадоволни од работата на ВМРО-ДПМНЕ, немаше да и дадат толкава и убедлива поддршка на локалните избори. Тоа е најјасната порака од народот дека има доверба во политиките кои носат резултати“,
соопштија од владејачката партија.
Како што велат од партијата, СДСМ со години го оштетувал државниот буџет за лични и партиски интереси, па поради тоа денес не може да држи прес-конференции за подобар животен стандард и економија.
„Колку е иронично што СДС зборува за инфлација кога токму во нивно време државата се соочи со двоцифрена инфлација и економска нестабилност“,
порачаа од ВМРО-ДПМНЕ.
Од оваа партија додадоа дека опозицијата наместо да излегува со вакви теми во јавноста треба да се посвети на внатрешни реформи, да расчисти со старите структури и да понуди кредибилитет пред јавноста.