„Кога ви зборува Филипче, само потсетете се кој е тој, какви се неговите морални вредности и со која екипа лојално и бескомпромисно ја уништуваше Македонија“, коментираат од владејачката партија откако лидерот на СДСМ повика на обединување околу европската иднина на државата
Слаткоречивите изјави на Филипче полни со загриженост за иднината на народот се всушност параван за предавство – реагираат од владејачката ВМРО-ДПМНЕ откако лидерот на СДСМ, Венко Филипче, денеска повика на обединување околу европската иднина на Македонија, велејќи дека социјалдемократите ќе им се спротивстават на најавите за изолација на државата.
„Кога ви зборува Филипче, само потсетете се кој е тој, какви се неговите морални вредности и со која екипа лојално и бескомпромисно ја уништуваше Македонија. Тоа се зборови на човек кој е потонат во криминал, без ронка респект кон својот народ и држава и кој спие на увото дека нашиот народ ќе ги заборави сите злодела што тој и Заев ги направија и дека има кратко памтење и повторно ќе го прелажат. Овие луѓе ги знаете, ништо добро Македонија не видела од нив. Ниту, пак, ќе види“,
велат од ВМРО-ДПМНЕ.
Во реакцијата на владејачката партија се додава дека европската идеја е жива и дека таа ќе биде одбранета бидејќи претставува идеја на почит, добрососедство и прифаќање на идентитетот на сите, а не, како што велат, потчинување и понижување на народот. Борбата на ВМРО-ДПМНЕ, додаваат оттаму, е да се најде достоинствено решение наместо да се потклекне на притисоците, предавствата и интригите на СДСМ.
„Дали СДС е свесен дека цената на ова што го зборува е национално предавство, уништување на идентитетот и ставање нова јамка на вратот на македонскиот народ, како што веќе ставија со францускиот предлог и договорот со Бугарија? Ако сфаќа, значи свесно прават предавство поради бизнисите на Заеви поврзани со бугарски фирми, ако не се свесни, еве им објаснуваме барем на оние малкумина кои преостанале и кои слепо го следат двоецот Заев–Филипче – да се освестат“,
додаваат од ВМРО-ДПМНЕ.
Покрај повикот за обединување за европската иднина на државата, лидерот на СДСМ, Венко Филипче, на денешната прес-конференција остро ја критикуваше изјавата на премиерот Христијан Мицкоски дека е подготвен да чека децении за членство во ЕУ, посочувајќи дека граѓаните не смеат да бидат заложници на политики што носат стагнација, сиромаштија, иселување на младите, криминал и корупција.