Од Град Скопје обвинија дека ВМРО-ДПМНЕ креира наводни скандали и ја труе јавноста со измислици
Пред две недели, Град Скопје склучил договор за снимање со дрон вреден милион денари со фирмата „Флај Кем“, која е во сопственост на сопругот на министерката за образование Мила Царовска, реагираа денеска од ВМРО-ДПМНЕ.
„Предмет на договорот за сопругот на Царовска е услуга за изнајмување на опрема за висинско набљудување на шумски површини во скопската котлина за рана детекција на растителни болести!? Во моменти кога Македонија тоне во здравствена и во економска криза, а се повеќе деца се заболени и имаат последици од короната, во време кога училиште во Скопје се затвори пред налетот на епидемијата, прашање е која е вистинската причина сега, во изборна година Петре Шилегов да спроведува ваков проект? Потребен ли е ваков проект за Мила Царовска да го обезбеди бизнисот на својот сопруг за цела година со еден милион денари?“,
праша Наум Стоилковски, портпарол на ВМРО-ДПМНЕ.
Стоилковски рече дека сомнежот за можна злоупотреба е поголем затоа што ваквите договори се повторуваат.
„На пример, истата фирма беше ангажирана од Шилегов во мај 2019 година за снимање на диви депонии во Скопје, за речиси иста сума од милион денари за една година, а во тој период се одвиваа избори. Режимот се повеќе е отуѓен од реалноста, и се му е евтино – од одмори во Мексико и Дубаи, до милион денари за снимање дрва со дрон! А еден милион денари чинат 740 вакцини по пазарна цена од 26 долари. Еден милион денари се половина милион плати од по два денари колку што се исплатени на текстилната индустрија во Штип“,
рече Стоилковски.
Од Град Скопје велат дека ВМРО-ДПМНЕ креира наводни скандали и ја труе јавноста со измислици.
„Кога во неполни 3.5 години, од кои една е во услови на светска пандемија, Градот и градоначалникот успеаа во рекордно време да завршат четири нови булевари, реконструираат цел клинички центар и да ја изградат монтажната болница, кога се завршува мостот на Вардар во Аеродром, кога секоја година се градат десетици километри нови велопатеки, подигаат илјадници квадратни метри нови зелени површини и истовремено се уредуваат запуштени јавни простори, се подигнуваат нови дрвореди, се уредуваат зелени покриви, кога светските организации за мерење на загадувањето на воздухот бележат континуиран пад на загаденоста во Скопје, кога низ градот се движат 33 нови МАН автобуси на гас, се пробива и расчистува кејот на Вардар и кога после 30 години управување со Град Скопје, градоначалникот Шилегов успеа за само три години да го доведе градот пред набавка на трамвај на тркала, логично е дека оваа партија ќе нема што друго да прави освен да измислува скандали и да пласира лажни вести“,
стои во реакцијата на Град Скопје.