Според ВМРО-ДПМНЕ, наместо Филипче да се занимава со унгарската политика, енергијата треба да ја насочи во сопствените редови во партијата
Наместо да бидат кредибилна опозиција и коректив на власта во Македонија, СДСМ и лидерот Венко Филипче веќе пет дена слават изборна победа во друга држава. Причината за славењето на „Бихаќска“ се резултатите од изборите во Унгарија, велат од владејачката ВМРО-ДПМНЕ во денешното соопштение.
Од партијата велат дека СДСМ и Филипче слават победа на партија која е идеолошки блиска до ВМРО-ДПМНЕ, додека нивната официјална сестринска партија во Унгарија едвај освои еден отсто од гласовите и остана надвор од парламентот.
„Гледајќи ја еуфоријата кај Филипче, човек би помислил дека СДС победил на избори и тој само што не станал премиер. Наместо реформи, аргументирани критики и издржани предлози, од СДС и Филипче гледаме само ширење лаги, демагогии и празни флоскули на кои никој не им верува, што резултира со доверба од граѓаните на праг од статистичка грешка“,
се вели во соопштението од ВМРО-ДПМНЕ.
Според ВМРО-ДПМНЕ, наместо Филипче да се занимава со унгарската политика, енергијата треба да ја насочи во сопствените редови во партијата.
„Треба да се запрашаат зошто сите поранешни функционери бегаат од нив, додека пак актуелни се дистанцираат и водат различна политика од лојалистите на Зоран Заев, кој ги предводи токму Венко Филипче“,
се додава во соопштението.
Од партијата го упатуваат лидерот на СДСМ, Венко Филипче, да се запраша и зошто на партискиот конгрес присутни биле само 60 проценти од делегатите.
„Кога веќе СДС и Филипче повеќе се занимаваат со унгарските избори, отколку со консолидирање на партијата, ги прашуваме дали репер за нив е нивната сестринска партија која освои само еден процент од гласовите и дали целта им е да стигнат до тоа ниво на гласови?“,
прашуваат од ВМРО-ДПМНЕ.
Оттаму велат дека со овие антидржавни политики, кои се синоним за политиките на Заев, СДСМ под водство на Филипче несомнено ќе стане маргинална партија.