Прославата за 20 години од потпишување на Охридскиот рамковен договор се претвори во партиска забава, а не државна прослава и затоа ВМРО-ДПМНЕ не присуствуваше на таквиот декор, велат од најголемата опозициска партија по повод реакциите за неприсуството на челните луѓе на оваа прослава.
„Сега не е време, ниту место за партиски политички промоции во време на прогласена кризна состојба и во време на повторно влошување со пандемијата на ковид во државата. Наместо парите да се потрошеа за политички забави, власта на СДСМ и ДУИ требаше да ги пренамени во многу по продуктивни и побитни работи за граѓаните и државата во моментов“,
велат од ВМРО-ДПМНЕ.
Од партијата велат дека парите можело да бидат пренаменети за реконструкција на училишта, водоводни и канализациони мрежи во Полошкиот Регион и, како што велат, да се купат неколку нови противпожарни возила, со што би спречиле повторна катастрофа со шумските пожари.
„Најголемите непријатели на Охридскиот рамковен договор се токму СДСМ и ДУИ со секојдневното пљачкосување на граѓаните, криминалот и тендерите за нивните блиски луѓе и со секојдневните поделби на граѓаните. Парадата денес ќе заврши, парите ќе ги потрошат, славјето ќе помине, а реалноста ќе остане. Младите повторно ќе заминуваат од Македонија, фирми ќе се затвораат, луѓе ќе остануваат без работа заради неспособноста и криминалот на двоецот СДСМ-ДУИ“,
велат од опозициската партија во соопштението.