Опозициската ВМРО-ДПМНЕ и денеска ја критикува власта за проблемите што се појавуваат во процесот на тестирање на платформата за онлајн-настава.
Според Марија Митева, има многубројни поплаки од родителите, учениците и наставниците, додека честите проблеми го доведуваат во прашање почетокот на учебната година на 1 октомври.
„Факт е дека следните неколку недели ќе се потрошат на дополнителни обуки. Време за имплементација, време за обуки на кадар, но не и време за пренесување на знаењето на учениците. Покрај безбројните проблеми со кои се соочуваат сите, за жал, ќе има и ученици, близу 40 илјади, кои од различни причини нема да можат да пристапат до платформата“,
рече Митева на прес-конференцијата.
Според опозицијата, оваа Национална платформа, која се промовира како „нова“, претставува компилација на веќе постојни системи, но проблемот е, како што велат, тоа што таа не функционира.