ВМРО-ДПМНЕ поднесе околу 950 амандмани за Предлог-законот за Академија за судии и јавни обвинители, соопшти на денешната прес-конференција пратеникот Антонио Милошоски од ВМРО-ДПМНЕ.
Целта е како што рече, на владејачкото мнозинство да му се укаже дека треба што поскоро да стави крај на ставањето европско знаменце на закони кои немаат никаква допирна точка со европска регулатива за да се скрати рокот за остварување на одреден политички или коалициски договор на Владата.
„Токму ваков е примерот со предлог-законот за Академија за судии и јавни обвинители, каде објективните критериуми се девалвираат на сметка на зголемувањето на субјективизмот и одлучувањето на Комисијата, при оценувањето на можните студенти на Академијата за судии и јавни обвинители, која е составена во голем дел по препорака на извршната власт и на Министерството за правда“, рече Милошоски.
Прашан за Законот за јавнообвинителска служба, Милошоски рече дека ќе поднесат доволен број амандмани за овој закон, за да го блокираат неговото донесување.
„Се додека постои голем сомнеж за сторен криминал, за незаконски земени награди и за злоупотреба на службената положба од страна на сите специјални јавни обвинители и голем број истражители и нивни соработници, сметаме дека не треба да има било какво легализирање на тие сомнежи за незаконито работење. И затоа инсистираме доколку собраниското мнозинство има искрена намера да ја гласа нашата иницијатива за формирање анкетна комисија за увид во материјално-финансиското работење на СЈО. Го повикуваме државниот јавен обвинител што поскоро да излезе со конечна истрага и можни обвиненија за злоупотреба на службена положба по однос на незконито доделување парични награди на членовите на СЈО и нивните соработници“, рече Милошоски.