ВМРО-ДПМНЕ нема да го поддржи предлог-законот за управување со природното и културното наследство на Охридскиот регион. На денешната расправа на собраниската комисија за култура, опозицијата најави дека нема да застане зад предлогот поради, како што тврди, низа нелогичности и контроверзи во текстот. Најголемите забелешки се однесуваат на советот што допрва треба да се формира и кој ќе ја има клучната улога во промените со кои треба да се заштити овој регион. Опозицијата прашува зошто се предложени нееднакви критериуми за избор на членови на советот.
„Ако на пример, претставникот кој треба да го предложи Владата на Р.М. треба да има искуство во управувањето со културното и природното наследство во Охридскиот регион, претставникот на минситерството за животна средина треба биде од редот на истакнати научни и стручни работници од областа на заштитата и да има стручно звање доктор на науки со 10 годишно работно искуство, исто како и претставникот од министерството за култура… но претставникот на министерството за политички систем и односи меѓу заедниците не треба да ги исполнува овие критериуми. Зошто е тоа така?“
праша Магдалена Манаскова од ВМРО-ДПМНЕ.
За опозициските пратеници спорен е и ставот 15 од членот 8, со кој се регулира начинот на кој советот би требал да ги носи одлуките.
„Советот за Охридскиот регион одлучува со мнозинство гласови од вкупниот број членови на Советот за Охридскиот регион, при што мора да има мнозинство гласови од вкупниот број на членови на Советот за Охридскиот регион кои припаѓаат на заедниците кои не се мнозинство во Р.С. Македонија“,
се вели во спорниот член.
„Ова нема никаква врска со стручноста на луѓето и е позитивна дискриминација и дискриминација на членовите на Советот без разлика на која етничка припадност припаѓаат. Што е проблемот? Како ќе очекуваме било која одлука да биде донесена ако ние на ваков начин го конципираме гласањето во овој Совет? Дали сега на сите ви е јасно, а особено на пошироката јавност, зошто ние тврдиме дека ова тело нема да донесе ниедна одлука за да се урне објектот на Нефи Усеини во центарот на Охрид кој гледаме и дека е застаклен и зошто нема да се донесе било каква одлука за рушење на некоја од дивоградбите во Струга?“
праша понатаму Манаскова.
Според опозицијата, единствено што ќе се реши со овие законски измени е тоа што градоначалниците на Охрид и Струга, Константин Георгиески и Рамиз Мерко ќе добијат алиби и ќе се „вадат“ на одлуките кои ќе ги носи идниот Совет за управување со Охридскиот регион. Тие најавија и дека за претстојните дискусии сигурно ќе поднесат и голем број амандмани поради овие спорни точки.
Минатата седмица, земјава од УНЕСКО доби уште една шанса за Охрид да го задржи статусот на заштитено природно и културно подрачје – до февруари догодина треба да поднесе извештај за преземените мерки, врз основа на кој УНЕСКО идниот јуни конечно ќе реши дали Охрид останува под нивната капа или не.