На пример, во Пехчево нема заболени од коронавирусот, учениците ќе одат на училиште, во Тетово има многу заразени, учениците ќе имаат онлајн настава… Наставниците, но и родителите треба во најголем број да бидат вакцинирани, напиша на Фејсбук професорката Весна Јаневска
ВМРО-ДПМНЕ се согласува со одлуката на Владата за настава со физичко присуство од оваа учебна година, но ја критикува министерката за образование Мила Царовска дека не може оваа одлука да важи за сите региони, односно за секој регион треба да се прави проценка врз основва на епидемиолошката состојба.
„На пример, во Пехчево нема заболени од коронавирусот, учениците ќе одат на училиште, во Тетово има многу заразени, учениците ќе имаат онлајн настава. Кога ќе се смени ситуацијата и училиштата ќе се прилагодат. За обезбедување на сигурност на децата, тие може еднаш неделно да се тестираат со брзи бесплатни тестови, како и евентуално невакцинираните наставници. Наставниците, но и родителите треба во најголем број да бидат вакцинирани“,
напиша на својот Фејсбук профил професорката Весна Јаневска.
Јаневска, во име на опозициската партија исто така критикува и во однос на непрецизноста на упатствата за тоа како ќе се постапи ако се појави позитивен ученик во училиштата, или како, ако има позитивен наставник.
„На пример, децата се во училница, а позитивниот наставничка на екран? Кој ќе држи настава, замена, или ќе губат настава, или и тие заради наставникот ќе следат настава онлајн, или како и минатата година ќе се потскриваат одредени епидемиолошки податоци, за што многу се зборува во јавноста меѓу учениците и наставниците. Можеше во тек на летото да се изготви база на наставници-волонтери, кои ќе можеа да држат заменска настава. За возврат наставниците волонтери ќе стекнуваат искуство, се разбира под менторство и ќе добијат поени (предност) за вработување или унапредување“,
вели Јаневска, потсетувајќи дека 13 дена пред почеток на учебната година нема учебници, ни обични, ни дигитални, за прво и четврто одделение.