Покрај Струмица, оттаму велат дека успеале да „зеземат“ уште неколку општини кои досега биле раководени од кадри на Социјалдемократскиот сојуз
Од владејачката ВМРО-ДПМНЕ велат дека резултатот што го оствариле на вчерашните локални избори е историски, притоа особено истакнувајќи ја победата на нивниот кандидат за градоначалник во Струмица, или, како што го нарекуваат, „бастионот на СДСМ“.
„По 20 години ВМРО-ДПМНЕ победи во бастионот на СДС, Струмица. Уште во вториот круг кандидатот на ВМРО-ДПМНЕ, Петар Јанков, го освои градоначалничкиот мандат, забележувајќи историска победа со разлика од над 5 000 гласови“,
се наведува во соопштението од партијата.
Покрај Струмица, оттаму велат дека успеале да „зеземат“ уште неколку општини кои досега биле раководени од кадри на Социјалдемократскиот сојуз.
Наместо СДСМ, кадри на ВМРО-ДПМНЕ во наредните четири години ќе раководат со општините Берово, Делчево и Маврово-Ростуше, каде владејачката партија победи во првиот круг, а очекуваат да ја преземат локалната власт од политичкиот опонент и во Пробиштип, Демир Капија, Старо Нагоричане и Валандово, каде влегуваат со предност во вториот круг од изборите за градоначалник закажани на 2 ноември.
Од владејачката партија наведуваат оти нејзините кандидати за градоначалници победиле во првиот круг во 33 општини, додека СДСМ само во три помали.
Меѓу 33-те општини каде нивните кандидати триумфирале во првиот круг, од партијата ја наведуваат и Старо Нагоричане, иако погоре во соопштението велат дека таму водат со значителна предност и очекуваат победа во вториот круг.
„Берово, Битола, Босилово, Бутел, Василево, Вевчани, Велес, Гази Баба, Гевгелија, Ѓорче Петров, Градско, Делчево, Демир Хисар, Зелениково, Илинден, Јегуновце, Кавадарци, Карбинци, Кисела Вода, Кратово, Новаци, Ново Село, Охрид, Петровец, Пехчево, Прилеп, Радовиш, Ресен, Свети Николе, Сопиште, Старо Нагоричане, Струмица и Штип се општините кои во прв круг добија градоначалници од редовите на ВМРО-ДПМНЕ“,
наведуваат од партијата.
Инаку, нивниот кандидат за градоначалник, според досега обработените податоци од страна на ДИК, има точно 50 отсто освоени гласови, што е на границата потребни гласови за победа во првиот круг.
Од ВМРО-ДПМНЕ велат дека покрај победите на нивните кандидати за градоначалници во повеќе скопски општини (Гази Баба, Бутел, Ѓорче Петров и Кисела Вода), со голема предност влегуваат во вториот круг во општините Аеродром и Карпош, како и во Градот Скопје.
Според партијата, освен нивната, како што ја нарекуваат, историска победа, и дебаклот на СДСМ, на овие локални избори се забележува уште еден важен момент.
„ДУИ со нивната деструктивна и националистичка реторика и политика, е целосно декласирана“,
велат од ВМРО-ДПМНЕ.
Од партијата велат дека овие локални избори се историски и поради тоа што на претходните во 2021 година, во прв круг освоиле 22 градоначалници, а СДСМ девет.
„На овие избори македонските граѓани покажаа дека сакаат Македонија да напредува и да се развива, избра луѓе кои ќе работат во нивен интерес и во интерес на државата“,
наведуваат од владејачката партија.