Наместо развој и модернизација, како што ветуваше Христијан Мицкоски пред граѓаните кога ја бараше поддршката, на главниот град постојано му се случува нов хаос, одново и одново, обвинуваат од СДСМ. Виновник за хаосот со ѓубрето во Скопје, според нив е опозициската ВМРО-ДПМНЕ од каде што бараат итно решение.
„Овој пат ДПМНЕ создаде хаос со сметот, Скопје се задушува во ѓубре. ДПМНЕ треба итно да преземе нешто, да се надмине проблемот и да се обезбеди функционалност на ЈП ‘Комунална хигиена’. Скопјани ваков однос не заслужуваат. Скопје ова не го заслужува. Во меѓувреме, градоначалниците на ДПМНЕ во Скопје да земат нешто да работат и да помогнат во чистењето на ѓубрето“,
кажа Љубица Јанчева, советничка од СДСМ во Советот на Град Скопје.
Од ВМРО-ДПМНЕ возвратија дека СДСМ и градоначалничката Данела Арсовска треба да преземат одговорност и да го решат проблемот со отпадот.
„Скопје тоне во ѓубре, Ковачевски и Арсовска да се договорат да го исчистат, исто како што се договараат за тендери. Како што беа сложни Ковачевски и Арсовска кога советниците на СДС и ги гласаа финансиските програми, така да бидат и сега и да го исчистат Скопје. Како што беа сложни со тендерот за гориво во ЈСП, така нека се сложни и сега и да го исчистат Скопје. Ковачевски и Арсовска го заглавија градот Скопје, секој месец нови проблеми“,
велат од ВМРО-ДПМНЕ.