Спикерот Талат Џафери, претходно, на прашање дали се сретнал со координаторите од опозициските партии, рече дека нема што да разговара за ултиматуми
Од Алијанса и Алтерантива рекоа дека ќе ги гласаат пакет – законите со антикризни мерки, но само ако прво се одблокира законот за државјанство. Во спротивно ќе поднесуваат амандмани на секој предлог-закон
Координаторот на пратеничката група на ВМРО-ДПМНЕ Никола Мицевски денеска, пред почетокот на седницата за пратенички прашања, ги донесе на прес-конференција опозициските пратеници, за кои рече дека се подготвени да присуствуваат на посебна седница со четири точки на дневен ред, за да може да се донесат законите за имплементација на петтиот пакет антикризни мерки.
„Стопанството и граѓаните немаат уште време за чекање. Го повикувам парламентарното мнозинство уште денеска да закаже седница и да се донесат законите. Овие пратеници зад мене се подготвени да присуствуваат на седницата“,
рече Мицевски.
Тој рече дека членот 69 став 1 од собранискиот Деловник дава можност за таква седница.
И Алијанса и Алтернатива се „за“, но прво законот за државјанство
Коалицијата Алијанса за Албанците и Алтернатива ќе ја блокира седницата за законите од петтиот пакет мерки, доколку се одржи, што претходно на прес-конференција ја побара координаторот на пратеничката група на ВМРО-ДПМНЕ Никола Мицевски.
Пратеникот Скендер Реџепи на прес-конференција во Собранието веднаш по Мицевски рече дека тоа ќе го направат со поднесување амандмани за секој предлог – закон.
Тој прецизира дека ќе ги поддржат сите пакет мерки, но само доколку прво се најде решение за законот за државјанство.
„Денешното барање да има вонредна седница за финансискиот пакет мерки, петтиот по ред, ние ќе се изјасниме онака како што сме се изјасниле досега. Сета блокада почна кога мнозинството во Собранието заедно со македонската опозиција го блокира Законот за државјанство и тоа е условот, тоа е првиот чекор со што се друго оди наследно согласно таа блокада“,
рече Реџепи.
Спикерот Талат Џафери, претходно, на прашање дали се сретнал со координаторите од опозициските партии, рече дека нема што да разговара за ултиматуми.