По долг период на зборување во јавноста и неколку дена по јавното сведоштво дека Зоран Заев гради 42-катница во Дубаи, стигна и потврда од Венко Филипче, соопштија од ВМРО-ДПМНЕ
Вистинското лице на СДСМ излегува на површина. Откако седум години ја испокрадоа и уништија државата, економијата и достоинството, отидоа во една од најбогатите држави да градат висококатници. По долг период на зборување во јавноста и неколку дена по јавното сведоштво дека Зоран Заев гради 42-катница во Дубаи, стигна и потврда од Венко Филипче, соопштија од ВМРО-ДПМНЕ.
„На прашање од новинарите дали тој со Заев гради висококатница во Дубаи, Филипче вели дека тој не градел. Признанието дека Филипче не гради, не може да се протолкува поинаку, освен како признание и потврда на нашите тези и на последното сведоштвото на Тома Аврамски, дека во Дубаи Заев гради зграда висока 42 ката. Ова не е ништо друго, освен официјална потврда од чуварот на фотелјата во СДС на вистинскиот претседател Заев, Венко Филипче, дека неговиот ментор го проширил својот бизнис, и тоа во градежниот сектор, и гради 42-катница во Дубаи“,
посочуваат од владејачката партија.
Од ВМРО-ДПМНЕ го повикаа лидерот на СДСМ Венко Филипче да одговори како ја доби златната виза во Дубаи, „затоа што до ден денес не објави документи за напредни разговори за работен ангажман со некоја болница од таму, нешто за што тврдеше дека е така“.
„Значи, ако не градел висококатница со Заев во Дубаи, на кој начин се стекнал со златна виза? Друго прашање на кое Филипче должи одговори пред цела македонска јавност, е дали станот што беше кажан во сведоштвото на Аврамски е во сопственост на Филипче или можеби го препишал на некое трето лице? Од друга страна, одговори на целата јавност должи и Зоран Заев. Треба јавно да соопшти, како стигна до милионите со кои инвестира и гради облакодери во Дубаи? Апелираме да не одолговлекуваат, затоа што вистината, порано или подоцна, на овој или на оној начин, секогаш излегува на виделина“,
се наведува во соопштението на ВМРО-ДПМНЕ.