„Во делот на лагите дека ИПАРД е блокирана од ЕУ, нема поголем демант од ставот на Делегацијата на ЕУ, од каде што наведоа: ‘Ја поздравуваме одлуката на националните институции да ги суспендираат сите исплати од ИПАРД-3 додека не се разјаснат околностите. Со оглед на тоа дека во моментов во тек е истрага, не би можеле да дадеме дополнителни коментари’“, велат од ВМРО-ДПМНЕ, цитирајќи став на Делегацијата на ЕУ
Откако СДСМ го прозва премиерот Христијан Мицкоски дека тој како претседател на влада не може да ја стопира исплатата на средствата од ИПАРД-програмата туку дека тоа го прави ЕУ, од ВМРО-ДПМНЕ велат дека потврда за тоа дека Владата издејствувала времено стопирање на програмата дала и Делегацијата на ЕУ во земјава.
„Во делот на лагите дека ИПАРД е блокирана од ЕУ, нема поголем демант од ставот на Делегацијата на ЕУ во Скопје, од каде што наведоа: ‘Ја поздравуваме одлуката на националните институции да ги суспендираат сите исплати од ИПАРД-3 додека не се разјаснат околностите. Со оглед на тоа дека во моментов во тек е истрага, не би можеле да дадеме дополнителни коментари’“,
велат од ВМРО-ДПМНЕ, цитирајќи став на европската делегација.
Според владејачката партија, институциите по првпат преземаат мерки за корупција каде што осомничен е актуелен директор без за тоа да има претходен притисок од медиумите и јавноста и без да постои јавен скандал.
„Во време на СДС, свиркачи и медиуми вадеа документи, видеа и аудиоснимки од криминали за тогашни функционери, а Заев, Ковачевски и Филипче не само што не ги менуваа, туку и ги штитеа и вршеа притисок врз институциите да не отворат постапки“,
додаваат од ВМРО-ДПМНЕ.
Во врска со барањето на СДСМ за оставка на министерот за земјоделство Цветан Трипуновски, од ВМРО-ДПМНЕ велат дека Агенцијата за финансиска поддршка на земјоделството и руралниот развој, каде што е регистриран корупцискиот скандал, е самостојна во своето менаџирање.