„Тој кој не кажа ни збор кога Бугарија бараше да не постоиме како народ. Тој кој ја потпиша капитулацијата наречена преговарачка рамка, со наведната глава и без консултација со народот. Тој што направи параван од ‘европски вредности‘ за да протне асимилација под европско знаме“, велат од владејачката партија
Откако поранешниот министер за надворешни работи и потпретседател на Демократската унија за интеграција (ДУИ), Бујар Османи реагираше на изјавите на премиерот Христијан Мицкоски, обвинувајќи го за ширење на омраза и разгорување на религиска и етничка нетолеранција, вечерва се огласија и од ВМРО-ДПМНЕ, застанувајќи во одбрана на нејзиниот лидер.
„Бујар Османи, министерот кој го прифати францускиот предлог без да трепне, кој го претвори Министерството за надворешни работи во огранок на бугарското МНР и кој ги жртвуваше македонскиот идентитет, јазик и историја за фотосесија со европски бирократи, сега се јавува со патетични морални лекции“,
се вели во партиската реакција.
Оттаму велат дека Османи зборува за „внатрешна кохезија“ откако со години активно работеше на нејзино разнебитување.
„Тој кој не кажа ни збор кога Бугарија бараше да не постоиме како народ. Тој кој ја потпиша капитулацијата наречена преговарачка рамка, со наведната глава и без консултација со народот. Тој што направи параван од ‘европски вредности‘ за да протне асимилација под европско знаме“,
велат од владејачката партија.
Посочија и дека ако некој ја злоупотреби политиката за криминали цели, тоа се ДУИ и Османи.
„Да му појасниме: Македонија не е ничиј туѓ дом, ама не е ни дом на политичари што ја распродаваат. Граѓаните не ја заборавија шверцерската ноќ на 16 јули. Не ја заборавија тишината со која дозволи да се гази врз сè македонско. Не заборавија дека твојата ‘дипломатија‘ заврши со тоа Македонија да не започне ниту еден кластер, ама затоа добивме бугарски клубови и закани за порекнување на нашето постоење“,
пишуваат од партијата.
Му порачаа на Османи дека историјата ќе го памети како министерот кој го прифати условот македонскиот народ да стане „производ на Коминтерната“.
Претходно Османи, на својот Фејсбук профил, ја оцени за скандалозна денешната изјава на премиерот Христијан Мицкоски дека поранешниот министер за надворешни работи дека со поддршката на францускиот предлог му нанел „нож во грбот“ на македонскиот идентитет, нешто што додаде, дека нема да му биде заборавено.
„Можеш да вреѓаш, да се закануваш, да фрлаш клетви и анатеми, да колнеш но Христијан, имаш еден клучен пропуст во твоето поимање на реалноста. Ние Албанците не сме гости во оваа земја туку домаќини. Ова е наш дом, овде сакаме да ја предвидиме нашата иднина и иднината на нашите деца и не сакаме да си одиме од овде“,
напиша Османи.
Премиерот денеска на прес-конференција во Владата ја коментираше политичката состојба на земјата со соседна Бугарија и директно го обвини Османи, дека точно знаел што прави кога го прифатил францускиот предлог.