Славески рече дека инфлацијата претставува дополнителен проблем, а во проекциите на Министерството за финансии „овие проблеми на волшебен начин исчезнуваат во втората половина од 2022 година“
Проекциите за буџетот за 2022 година се направени погрешно, економскиот раст ќе биде значително понизок од предвидениот, а ќе продолжи растот на буџетскиот дефицит и јавниот долг, порача денеска Трајко Славески од ВМРО-ДПМНЕ.
„За тековната 2021 година, која е појдовна основа за проекциите, министерството за финансии предвидува раст од 4,1%. Но високофрекфентните показатели за третиот квартал, од оваа тековната година упатуваат дека растот во втората половина од 2021 година најверојатно ќе биде низок или можеби негативен. Во септември 2021 година растот на индустриското производство изнесува – 8% додека градежништвото во јули и август забележува двоцифрен пад. Автомобилската индустрија во Република Македонија се соочува со сериозни проблеми во синџирите на снабдување. Сето ова упатува дека растот во 2021 година, најверојатно ќе биде значително понизок од предвидениот. За 2022 година министерството за финансии очекува раст на БДП од високи 4,6%. Малку е веројатно дека оваа проекција ќе се оствари. Во изминатите пет години од практикување на власта од страна на СДСМ и ДУИ растот на БДП никогаш не надминал 4%“,
порача Славески.
Притоа, додава тој, нејасно е како ќе се оствари овој раст во услови на големи проблеми во светот со синџирите на снабдување, можната енергетска криза како и се уште присутната здравствена криза.
Според него, инфлацијата претставува дополнителен проблем, а во проекциите на министерството за финансии вели, „овие проблеми на волшебен начин исчезнуваат во втората половина од 2022 година“.
„Ваквите нереални проекции придонесуваат за нереално проектирање на приходната страна на буџетот. Имено, министерството за финансии предвидува раст на даночните приходи од над 10% во 2022 година. Притоа, особено висок раст од 14% се предвидува кај Данокот на додадена вредност. Истовремено министерството за финансии предвидува раст на приватната потрошувачка од 3,5% и исто толкав раст на вработеноста. Повисоката цена на нафтата на светските берзи веројатно ќе придонесе за повисоки приливи по основ на ДДВ од увоз но сепак, раст од 14% на Данокот на додадена вредност е невозможен. Овде се поставува прашањето зошто проекциите за буџетските даночни приходи по основ на данок на добивка и данок на личен доход за 2022 година се поставени на толку ниско ниво (со пораст од само 2,59% и 1,25%, респективно), а имајќи ги предвид проекциите на Владата дека БДП ќе порасне за 4,1% во 2021 година. Би било логично и финансиските резултати на компаниите односно нивните добивки да бидат поголеми од 2019-та година со што и приходите во буџетот по основ на данок на добивка за 2022 година би биле значително повисоки“,
рече Славески.
Дали со вака ниско проектираните приходи во Буџетот од директните даноци, Владата има за цел да ја покрие својата неспособност во менаџирањето на Управата за јавни приходи и нивната неефикасност во справувањето со сивата економија и реално ниската наплата на даноци, праша Славески.
„Исто така, се прашуваме како една социјалдемократска влада во заминување сериозно отстапува од своите суштински определби во структурата на даночните приходи примат да имаат директните даноци (на доход и добивка), над индиректните даноци (на потрошувачка). Нереално проектираните приходи даваат искривена слика и проблеми во менаџирањето со јавните финансии. На расходната страна, порастот на платите е арбитрарен и се однесува само на одредени институции. Се поставува прашањето по кои критериуми министерството за финансии утврдило кои вработени и во кои институции колкав процент на зголемување на платите ќе добијат. Тоа навистина не е фер кон голем број вработени во државната управа и во јавниот сектор во целина“,
рече Славески.
Славески рече и дека сомнително растат буџетите на институциите задолжени за јавна безбедност, односно буџетот на ОТА – Оперативно техничка агенција се зголемува за цели 60%, а за 20% се зголемува и буџетот на Агенцијата за разузнавање.
Додаде и дека во буџетот за 2022 година, не се предвидени никакви средства за помош на ЕЛЕМ и МЕПСО и доколку не им се помогне може државата може да остане без електрична енергија.
„Највисок износ на капитални инвестиции досега Владата на СДСМ реализирала во 2017-та година и тоа во износ од околу 19 милијарди денари. Денес министерот за финансии нѐ убедува дека оваа иста Влада ќе реализира 37 милијарди денари капитални расходи. Ова е навистина неверојатно!“,
додаде Славески.
Славески се осврна и на буџетскиот дефицит кој вели дека само се продлабочува.
„Министерството за финансии во буџетот за 2022 година предлага буџетски дефицит од неверојатни 33 милијарди денари. Да ве потсетам, во нормалната преткризна 2019-та година, Владата на СДСМ реализираше буџетски дефицит од 13 милијарди денари, додека Владите предводени од ВМРО-ДПМНЕ реализирале највисок дефицит од 22 милијарди денари во 2014-та година која беше година одбележана од последиците од европска должничка криза. И наместо министерството за финансии да предложи фискална консолидација и постепено враќање на буџетскиот дефицит на предпандемиските нивоа, во буџетот за 2022 година предлагаат огромен буџетски дефицит со неверојатно образложение дека наводно„Капиталните расходи ќе бидат повисоки од буџетскиот дефицит“. Иако звучи примамливо за јавноста, ова не претставува новина. Имено, капиталните расходи во минатото се скоро секогаш или го надминуваат износот на буџетскиот дефицит, некогаш и двојно, освен 2013, 2014 година кои се години на европска должничка криза и 2020-та година – година на пандемиската рецесија“,
рече Славески.