Опозицијата смета дека кризната состојба ќе трае и по 8 декември и поради тоа бара нејзино продолжување
Опозицијата бара продолжување на енергетската криза во земјава, која се очекува да заврши на 8 декември. Владата на 9 ноември донесе одлука за прогласување енергетска кризна состојба со рок на траење од 30 дена.
Според пратеничката група на ВМРО-ДПМНЕ, кризата ќе продолжи да трае подолго и бараат Собранието да закаже садница за продолжување на кризната состојба.
„Како пратеничка група на ВМРО-ДПМНЕ сметаме дека граѓаните не смеат да бидат жртви на неизвесноста од тоа кои имаат мнозинство во Собранието и затоа бараме да се закаже седница на која ќе биде продолжена енергетската кризна состојба, а ние како пратеничка група со нашето присуство ќе помогнеме за обезбедување на кворум“,
се вели во соопштението на ВМРО-ДПМНЕ.
Од опозицијата велат дека имаат уште две барања – да се предвидат 250 милиони евра за субвенционирање електрична енергија на граѓаните и компаниите за да се спречи дополнителен ценовен шок и инфлација и барање за обезбедување на пари за сите општини кои од почетокот па до крајот на енергетската криза се соочиле со раскинување на договорите од страна на снабдувачите, односно да се покрие разликата помеѓу првичниот склучен договор и моменталната цена на струјата.
Енергетската криза со која се соочува земјата во моментот најмногу се должи на зголемените цени на берзите во Европа, поради што фирмите кои тргуваат со струја не се во можност да ја достават договорената количина со државните институции или со компаниите со кои склучиле договор.