Власта да им ги рефундира трошоците на десетте илјади граѓани кои се вакцинирале во Врање, бара ВМРО-ДПМНЕ. Од опозициската партија потенцираат дека бројот на вакцинирани во странство е многу поголем од официјалните податоци.
„10 илјади македонски граѓани се вакцинираа само во Врање, а вкупната бројка кои спас од КОВИД19 најдоа пред се во Србија и соседството надминува 40.000 македонски граѓани. Овие лица плаќале цел живот даноци и здравствено осигурување, за сега во ситуација кога им се загрозени здравјето и животите, да мораат да одат во странство да се вакцинираат и да трошат дополнителни средства за таа цел“
велат од ВМР-ДПМНЕ.
Од опозицијата додаваат дека смртноста од ковид во земјава е огромна и тврдат дека повеќе животи ќе се спасеа ако масовната вакцинација почнеше во јануари или февруари.
„Сега власта ако има барем грам доблест ќе прифати одговорност и ќе го поддржи предлогот на ВМРО-ДПМНЕ за рефундирање на средствата на граѓаните кои поради немањето вакцини во Македонија се вакцинираа во странство. Тоа е најмалку што власта може да стори да ја исправи оваа неправда кон оние кои со вакцинирањето во соседството го заштитија своето здравје, здравјето на најблиските и придонесоа за јавното здравје“
порачуваат од ВМРО-ДПМНЕ.