Грчките спасувачки екипи заедно со волонтерите петти ден трагаат по 31-годишниот Мартин, кој исчезна во водите на Егејското море, кај малото место Посиди на Халкидики. Во потрагата се вклучени два воздушни и еден подводен дрон, куче спасител со дресер а се пребарува и крајбрежјето, во случај Мартин да успеал да исплива до копното.
„Вложуваме натчовечки напори за да го најдеме момчето и да го вратиме кај семејството“,
вели Христос Рамос, шеф на спасувачкиот тим од ОФКАТ.
Мајката на Мартин апелираше до спасувачите на волонтерската служба ОФКАТ да не престанат да бараат ниту една минута, а со солзи во очите постојано им вели „сѐ што сакам е да го најдете моето дете, пренесуваат грчките медиуми.
Воедно, братот на Мартин во објава на Фејсбук вчера порача „иако поминаа четири дена, не губиме надеж и продолжуваме да бараме“.
Потрагата по исчезнатиот Мартин Јовановски продолжува и денеска. Вклучени се куче трагач, патролен чамец и воздушен дрон.