Оттаму велат дека победата на ВЛЕН во Чаир, Сарај, Арачиново, Желино и Теарце и водството во Тетово, Боговиње, Дебар, Струга, Брвеница и Долнени се далеку поголеми од победата на ДУИ во Пласница и во Липково
Владејачката коалиција ВЛЕН ја оцени за апсурдна изјавата на лидерот на Демократската унија за интеграција (ДУИ), Али Ахмети, кој рече дека коалицијата што ја предводи е победник на локалните избори. Оттаму велат дека победата на ВЛЕН во Чаир, Сарај, Арачиново, Желино и Теарце и водството во Тетово, Боговиње, Дебар, Струга, Брвеница и Долнени се далеку поголеми од победата на ДУИ во Пласница и во Липково.
„Мислевме дека Ахмети и ДУИ конечно станале свесни за резултатите од ‘референдумот’, но продолжуваат да ги доживуваат локалните избори како парламентарни, бидејќи за нив министерските позиции се единствената алатка за опстанок во политиката. Дваесет години политиката на Ахмети се градеше на два столба: власт и само власт“,
велат од ВЛЕН.
Владејачката коалиција му порача на Ахмети пред да бара предвремени парламентарни избори да се запраша дали ќе може да се соочи со слободниот глас на Албанците, кои, како што велат, веќе не се плашат од него.
Претходно денеска, Централното претседателство на ДУИ едногласно побара одржување предвремени парламентарни избори поради, како што наведоа од партијата, победата на коалицијата „Национална алијанса за интеграција“ на локалните избори и на претходните два изборни циклуса.