Сулејмани нагласи дека коалицијата ВЛЕН не се радува на овие случувања, туку дека им е потребна „силна, одговорна и кохерентна опозиција“
На новинарско прашање дали Мендух Тачи ќе влезе во Владата, Сулејмани рече дека имаат стабилно мнозинство, но оти на патот што ги очекува нема да му наштети ако во коалицијата влезат и други партии
Коалицијата ВЛЕН изрази длабока загриженост за турбуленциите што се случуваат во рамките на албанскиот опозициски камп велејќи дека тоа е „тивок распад и целосно губење на политичкиот компас“.
Претставникот на ВЛЕН, Дритон Сулејмани, истакна дека турбуленциите не ѝ служат на демократијата и на политичката стабилност во земјата.
„Демократијата се гради врз отворени дебати, фер конкуренција и силна опозиција. Но, она што го гледаме во последните денови не наликува ниту на опозиција ниту на стабилност, туку на тивок распад и целосно губење на политичкиот компас“,
рече Сулејмани на прес-конференција.
Од ВЛЕН ги коментираа неколкуте заминувања на политички субјекти од коалицијата НАИ („Национална алијанса за интеграција“), предводена од ДУИ. Сулејмани потсети дека од НАИ за краток период се заминати Мендух Тачи, Аријанит Хоџа и, последно, Алијанса за Албанците на Зијадин Села.
„Ова не се случајни движења. Ова се знаци на политичка структура што се распаѓа, што ја изгубила својата ориентација, својата внатрешна самодоверба и својот пат напред“,
изјави Сулејмани.
Сулејмани нагласи дека коалицијата ВЛЕН не се радува на овие случувања, туку дека им е потребна „силна, одговорна и кохерентна опозиција“.
„Не ни треба ’опозиција на парчиња’, не опозиција што се дели секоја недела, не опозиција што се плаши од дебата и транспарентност. Слабата опозиција не му штети на ВЛЕН, туку му штети на политичкиот систем на земјата, ја оштетува демократската рамнотежа и го остава граѓанинот без вистинска алтернатива“,
рече Сулејмани.
Коалицијата ги повика сите политички субјекти кои се нарекуваат опозиција да ја вратат „разумноста, сериозноста и одговорноста“.
Сулејмани ја потврди посветеноста на ВЛЕН кон реформите и соработката, но само со оние кои се сериозни и одговорни.
„ВЛЕН е тука да соработува со секоја политичка сила што е сериозна во врска со реформите, што ги почитува институциите и што му служи на граѓанинот, а не на лични интереси, не на пазарења, не на внатрешни препукувања“,
додаде тој.
ВЛЕН порача дека ќе продолжи „со сила по патот на промените“, но оти тој пат станува поправеден, поздрав и подемократски кога се соочува со функционална опозиција, а не со опозиција која „се распаѓа пред очите на народот“.
На новинарско прашање дали Мендух Тачи ќе влезе во Владата, Сулејмани рече дека имаат стабилно мнозинство, но на патот што ги очекува нема да му наштети ако во коалицијата влезат и други партии.
„Ние сме за вакви преговори, но тие да бидат во врска со реформи, принципи на добро владеење. Се работи на тоа и ќе видиме каков ќе биде исходот од сите овие преговори“,
одговори тој.
На дополнително прашање со кого конкретно се преговара, Сулејмани не даде одговор велејќи дека сè уште нема информации. Дополни дека нема конечен исход ниту за преговорите околу реконструкцијата на Владата и информациите што се шират во јавноста за рокади кај вицепремиерските позиции.
„Немаме конечно исход, се знае само дека прв заменик-премиер ќе биде Беким Сали, но како ќе го изведеме тоа, сè уште сме во преговори. Сега е последната фаза од преговорите и набргу ќе бидете запознаени“,
кажа Сулејмани додавајќи дека ќе има имиња само за празните позиции во Владата, а дека реконструкцијата се очекува во првото тримесечје од идната година.